سیدنا ابو طلحہ رضی اللہ عنہ سے روایت ہے کہ انہوں نے فرمایا: ”میں مسجد میں داخل ہوا تو میں نے رسول اللہ صلی اللہ علیہ وسلم کے رخِ مبارک پر بھوک کے آثار محسوس کیے، چنانچہ میں وہاں سے نکلا اور سیدہ ام سلیم رضی اللہ عنہا کے پاس آیا، جو کہ سیدنا انس بن مالک رضی اللہ عنہ کی والدہ تھیں، میں نے ان سے کہا: اے ام سلیم! میں نے رسول اللہ صلی اللہ علیہ وسلم کے چہرہِ اقدس پر بھوک کے نشانات دیکھے ہیں، کیا تمہارے پاس کچھ (کھانے کو) ہے؟ انہوں نے اپنی ہتھیلی سے اشارہ کرتے ہوئے کہا: میرے پاس کچھ چیز موجود ہے، تو میں نے ان سے کہا: اسے تیار کرو اور اچھی طرح بناؤ، پھر میں نے سیدنا انس رضی اللہ عنہ کو رسول اللہ صلی اللہ علیہ وسلم کی طرف بھیجا اور (انہیں سمجھا دیا کہ) آپ صلی اللہ علیہ وسلم کے کان میں چپکے سے بات کرنا اور انہیں (کھانے کی) دعوت دینا، جب سیدنا انس رضی اللہ عنہ پہنچے تو رسول اللہ صلی اللہ علیہ وسلم نے (صحابہ سے) فرمایا: ”یہ شخص خیر لے کر آیا ہے،“ پھر رسول اللہ صلی اللہ علیہ وسلم نے فرمایا: ”اے پیارے بیٹے! کیا تمہیں تمہارے والد نے ہمیں بلانے کے لیے بھیجا ہے؟“ اس پر رسول اللہ صلی اللہ علیہ وسلم نے اپنے اصحاب رضی اللہ عنہم سے فرمایا: ”بسم اللہ، چلو،“ سیدنا ابو طلحہ رضی اللہ عنہ کہتے ہیں کہ سیدنا انس رضی اللہ عنہ تیزی سے پیچھے مڑے یہاں تک کہ میرے پاس پہنچے اور بتایا کہ رسول اللہ صلی اللہ علیہ وسلم لوگوں کو ساتھ لیے آپ کی طرف تشریف لا رہے ہیں، میں گھر سے نکلا اور دروازے کے پاس سیڑھیوں کے آرام دہ حصے پر رسول اللہ صلی اللہ علیہ وسلم سے ملاقات کی اور عرض کیا: اے اللہ کے رسول صلی اللہ علیہ وسلم ! آپ نے ہمارے ساتھ کیا کیا؟ میں نے تو محض آپ صلی اللہ علیہ وسلم کے چہرہِ انور پر بھوک محسوس کی تھی، اس لیے ہم نے آپ کے کھانے کے لیے کچھ تیار کیا تھا، آپ صلی اللہ علیہ وسلم نے فرمایا: ”اندر آؤ اور خوش ہو جاؤ،“ پھر رسول اللہ صلی اللہ علیہ وسلم نے اس کھانے کو لیا اور اسے اپنے دستِ مبارک سے پیالے میں جمع کیا اور اسے درست فرمایا، پھر آپ صلی اللہ علیہ وسلم نے دریافت فرمایا: ”کیا کچھ سالن وغیرہ ہے؟“ تو گھر والے اپنا گھی کا برتن لے آئے جس میں کچھ گھی تھا یا شاید نہ ہونے کے برابر تھا، رسول اللہ صلی اللہ علیہ وسلم نے اپنے دستِ مبارک سے اشارہ کرتے ہوئے فرمایا: «فَاسْكُبْ مِنْهَا السَّمْنَ» ”اس میں سے گھی انڈیل دو،“ پھر آپ صلی اللہ علیہ وسلم نے فرمایا: ”دس دس کر کے میرے پاس (لوگوں کو) داخل کرو،“ چنانچہ سب نے کھانا کھایا اور شکم سیر ہو گئے، اور رسول اللہ صلی اللہ علیہ وسلم نے اس کھانے کے بارے میں جو بچ گیا تھا فرمایا: ”تم اور تمہارے گھر والے اسے کھاؤ،“ چنانچہ ان سب نے بھی کھایا اور وہ سیر ہو گئے۔“ [مسند أبي يعلى الموصلي/مسند أبي طلحة/حدیث: 1426]