سیدنا ابو رافع بن عمرو الغفاری رضی اللہ عنہ کے چچا سے روایت ہے کہ میں جب لڑکا تھا تو انصار کے کھجور کے درختوں پر پتھر مارا کرتا تھا، چنانچہ نبی کریم صلی اللہ علیہ وسلم سے عرض کی گئی کہ یہاں ایک لڑکا ہے جو ہمارے کھجور کے درختوں یا کھجوروں پر پتھر مارتا ہے۔ پھر مجھے نبی کریم صلی اللہ علیہ وسلم کی خدمتِ اقدس میں لایا گیا تو آپ صلی اللہ علیہ وسلم نے شفقت سے دریافت فرمایا: ”اے لڑکے! کھجوروں کو پتھر کیوں مارتے ہو؟“ میں نے عرض کیا: انہیں کھانے کے لیے۔ آپ صلی اللہ علیہ وسلم نے ارشاد فرمایا: ”کھجوروں کو پتھر نہ مارا کرو بلکہ جو خود بخود نیچے گر جائیں انہیں کھا لیا کرو۔“ پھر آپ صلی اللہ علیہ وسلم نے میرے سر پر دستِ شفقت پھیرا اور میرے لیے دعا فرمائی: «اللَّهُمَّ أَشْبِعْ بَطْنَهُ» ”اے اللہ! اس کا پیٹ بھر دے۔“ [مسند أبي يعلى الموصلي/مسند حارثة بن وهب/حدیث: 1482]