سیدنا عمر بن خطاب رضی اللہ عنہ سے روایت ہے کہ میں رسول اللہ صلی اللہ علیہ وسلم کی مجلس میں بیٹھا ہوا تھا کہ آپ صلی اللہ علیہ وسلم نے دریافت فرمایا: ”مجھے بتاؤ کہ اہل ایمان میں سے ایمان کے اعتبار سے سب سے برتر کون ہیں؟“ صحابہ کرام رضی اللہ عنہم نے عرض کیا: اے اللہ کے رسول صلی اللہ علیہ وسلم ! فرشتے۔ آپ صلی اللہ علیہ وسلم نے فرمایا: ”وہ تو ایسے ہیں ہی اور ان کے لیے یہ مقام سزاوار بھی ہے، اور انہیں ایمان لانے سے کیا چیز مانع ہوسکتی ہے جبکہ اللہ تعالیٰ نے انہیں اس خاص مقام و مرتبے پر فائز کر رکھا ہے جس پر وہ فائز ہیں؟ بلکہ ان کے علاوہ کوئی اور بتاؤ۔“ صحابہ نے عرض کیا: اے اللہ کے رسول صلی اللہ علیہ وسلم ! وہ انبیاء جنہیں اللہ تعالیٰ نے اپنی رسالت اور نبوت کے اعزاز سے سرفراز فرمایا۔ آپ صلی اللہ علیہ وسلم نے فرمایا: ”وہ تو ایسے ہیں ہی اور ان کے لیے یہ مقام برحق ہے، اور انہیں کیا رکاوٹ ہوسکتی ہے جبکہ اللہ تعالیٰ نے انہیں اس بلند مرتبے پر جگہ دی ہے؟ بلکہ ان کے علاوہ کوئی اور۔“ صحابہ نے عرض کیا: اے اللہ کے رسول صلی اللہ علیہ وسلم ! وہ شہداء جنہوں نے دشمنوں کے خلاف جامِ شہادت نوش کیا۔ آپ صلی اللہ علیہ وسلم نے فرمایا: ”وہ بھی ایسے ہی ہیں اور ان کے لیے یہ مرتبہ برحق ہے، اور انہیں کیا چیز مانع ہے جبکہ اللہ تعالیٰ نے انہیں انبیاء کے ساتھ شہادت کے اعزاز سے نوازا ہے؟ بلکہ ان کے علاوہ کوئی اور۔“ صحابہ نے عرض کیا: اے اللہ کے رسول صلی اللہ علیہ وسلم ! پھر وہ کون لوگ ہیں؟ آپ صلی اللہ علیہ وسلم نے ارشاد فرمایا: ”وہ لوگ جو ابھی مردوں کی پشتوں میں ہیں اور میرے بعد آئیں گے، وہ مجھ پر ایمان لائیں گے حالانکہ انہوں نے مجھے دیکھا نہیں ہوگا، اور وہ میری تصدیق کریں گے حالانکہ انہوں نے میرا مشاہدہ نہیں کیا ہوگا، وہ لکھے ہوئے اوراق پائیں گے تو جو کچھ ان میں درج ہوگا اس پر عمل کریں گے، پس یہی لوگ ایمان کے اعتبار سے تمام اہل ایمان میں سب سے برتر ہیں۔“ [مسند أبي يعلى الموصلي/مسند عمر بن الخطاب رضي الله عنه/حدیث: 160]