محمد بن سیرین رحمہ اللہ سے روایت ہے کہ کوفہ میں ایک شخص نے یہ گواہی دی کہ سیدنا عثمان رضی اللہ عنہ مظلومیت کی حالت میں شہید کیے گئے ہیں، تو پہرے داروں نے اسے پکڑ لیا اور سیدنا علی رضی اللہ عنہ کی خدمت میں پیش کر دیا اور عرض کیا: ”اگر آپ نے ہمیں کسی کو بھی (بغیر اجازت) قتل کرنے سے منع نہ فرمایا ہوتا تو ہم اسے قتل کر دیتے، اس کا دعویٰ ہے کہ یہ گواہی دیتا ہے کہ سیدنا عثمان رضی اللہ عنہ شہید کیے گئے ہیں۔“ تب اس شخص نے سیدنا علی رضی اللہ عنہ سے مخاطب ہو کر کہا: ”اور آپ خود بھی اس بات کی گواہی دیتے ہیں۔ کیا آپ کو یاد ہے کہ میں رسول اللہ صلی اللہ علیہ وسلم کی خدمت میں حاضر ہوا اور آپ سے کچھ مانگا تو آپ صلی اللہ علیہ وسلم نے مجھے عطا فرمایا، پھر میں سیدنا ابوبکر رضی اللہ عنہ کے پاس آیا اور ان سے سوال کیا تو انہوں نے بھی مجھے عطا فرمایا، پھر میں سیدنا عمر رضی اللہ عنہ کے پاس آیا اور ان سے سوال کیا تو انہوں نے بھی مجھے عطا فرمایا اور پھر میں سیدنا عثمان رضی اللہ عنہ کے پاس آیا اور ان سے سوال کیا تو انہوں نے بھی مجھے عطا فرمایا۔“ اس شخص نے مزید بیان کیا کہ میں نے رسول اللہ صلی اللہ علیہ وسلم کی بارگاہ میں عرض کیا تھا: ”اے اللہ کے رسول! اللہ سے دعا فرمائیں کہ وہ میرے مال و حال میں برکت عطا فرمائے۔“ تو نبی کریم صلی اللہ علیہ وسلم نے ارشاد فرمایا: «كَيْفَ لَا يُبَارَكُ لَكَ وَأَعْطَاكَ نَبِيٌّ وَصِدِّيقٌ وَشَهِيدَانِ، وَأَعْطَاكَ نَبِيٌّ وَصِدِّيقٌ وَشَهِيدَانِ، وَأَعْطَاكَ نَبِيٌّ وَصِدِّيقٌ وَشَهِيدَانِ؟» ”تمہیں برکت کیسے نہ دی جائے جبکہ تمہیں ایک نبی، ایک صدیق اور دو شہیدوں نے عطا کیا ہے، تمہیں ایک نبی، ایک صدیق اور دو شہیدوں نے عطا کیا ہے، تمہیں ایک نبی، ایک صدیق اور دو شہیدوں نے عطا کیا ہے؟“ (اس میں سیدنا عمر اور سیدنا عثمان رضی اللہ عنہما کی شہادت کی صریح پیش گوئی موجود ہے)۔ [مسند أبي يعلى الموصلي/رجل/حدیث: 1601]