سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم اپنے ایک صحابی کے ہمراہ ایک انصاری شخص کے پاس تشریف لے گئے جو اپنے باغ میں پانی کی گزرگاہیں درست کر رہے تھے۔ آپ صلی اللہ علیہ وسلم نے ان سے دریافت فرمایا: ”اگر تمہارے پاس رات بھر مشکیزے میں رکھا ہوا پانی موجود ہے تو پیش کرو، ورنہ ہم براہِ راست پانی پی لیں گے۔“ انہوں نے عرض کی: ”جی ہاں، اے اللہ کے رسول صلی اللہ علیہ وسلم ! میرے پاس مشکیزے میں رات بھر رکھا ہوا پانی موجود ہے۔“ پھر ہم ایک چھپر کی طرف گئے، جہاں انہوں نے اس پانی میں ایک بکری کا دودھ دوہا۔ رسول اللہ صلی اللہ علیہ وسلم نے اسے نوش فرمایا، پھر انہوں نے دوبارہ اسی طرح تیار کیا تو آپ صلی اللہ علیہ وسلم کے ہمراہ آنے والے صحابی نے بھی اسے نوش فرمایا۔ [مسند أبي يعلى الموصلي/مسند جابر/حدیث: 2097]