سیدنا جابر رضی اللہ عنہ سے روایت ہے کہ ایک دن رسول اللہ صلی اللہ علیہ وسلم منبر پر تشریف فرما ہوئے اور ارشاد فرمایا: ”کچھ لوگ سمندر میں سفر کر رہے تھے کہ ان کی ملاقات ایک جساسہ سے ہوئی“، میں نے عرض کیا کہ اللہ کے رسول! جساسہ کیا ہے؟ تو آپ صلی اللہ علیہ وسلم نے فرمایا: ”وہ ایک ایسی عورت (نما مخلوق) ہے جو اپنے جسم اور سر کے بالوں کو گھسیٹ رہی تھی“، اس نے ان لوگوں سے کہا: اس محل میں اس خبر کی اطلاع موجود ہے جس کے تم متلاشی ہو، چنانچہ وہ لوگ وہاں پہنچے تو وہاں ایک شخص کو مضبوطی سے بندھا ہوا پایا، اس نے کہا: مجھے خبر دو یا مجھ سے پوچھو میں تمہیں بتاؤں گا، جب لوگ خاموش رہے تو اس نے کہا: مجھے بیسان کے نخلستان اور زغر و عمان کے چشمے کے بارے میں بتاؤ کہ کیا وہ بار آور ہو چکے ہیں؟ انہوں نے کہا: جی ہاں، پھر اس نے پوچھا: مجھے زغر کے کیچڑ والے چشمے کے بارے میں بتاؤ کہ کیا اس میں پانی ہے؟ انہوں نے جواب دیا: ہاں، وہ بھرا ہوا ہے اور اس کے کناروں سے پانی لہریں مار رہا ہے، تب اس نے کہا: وہی مسیح (دجال) ہے جس کے لیے زمین لپیٹ دی جائے گی اور وہ چالیس (دن) میں سوائے طیبہ کے تمام روئے زمین کا چکر لگا لے گا، رسول اللہ صلی اللہ علیہ وسلم نے ارشاد فرمایا: ”وہ (طیبہ) مدینہ ہے، اس کے ہر ناکے پر فرشتہ میان سے نکلی ہوئی تلوار لیے کھڑا ہے جو اسے وہاں داخل ہونے سے روکے گا، اور مکہ مکرمہ کا بھی یہی حال ہے“، پھر آپ صلی اللہ علیہ وسلم نے تین بار فرمایا: ”وہ نہ بحیرہ فارس میں ہے اور نہ ہی بحیرہ روم میں ہے“، ابن ابی سلمہ رحمہ اللہ بیان کرتے ہیں کہ اس حدیث میں کچھ ایسی بات بھی تھی جو مجھے یاد نہیں رہی، وہ کہتے ہیں کہ سیدنا جابر رضی اللہ عنہ اس بات پر گواہی دیتے تھے کہ دجال دراصل ابنِ صیاد ہی ہے، میں نے عرض کیا کہ ابنِ صیاد تو مر چکا ہے، انہوں نے فرمایا: ”اگرچہ وہ مر چکا ہو“، میں نے کہا: وہ تو مسلمان ہو گیا تھا، انہوں نے فرمایا: ”اگرچہ وہ مسلمان ہو چکا ہو“، میں نے عرض کیا: وہ تو مدینہ میں داخل ہو چکا تھا، انہوں نے فرمایا: ”اگرچہ وہ مدینہ میں داخل ہو چکا ہو“۔ [مسند أبي يعلى الموصلي/مسند جابر/حدیث: 2178]