سیدنا انس بن مالک رضی اللہ عنہ سے روایت ہے کہ قبیلہ عصیہ، ذکوان اور بنو لحیان کے لوگ نبی کریم صلی اللہ علیہ وسلم کی خدمتِ اقدس میں حاضر ہوئے اور (یہ جتایا کہ) وہ اسلام قبول کر چکے ہیں، پھر انہوں نے اپنے دشمن کے خلاف آپ صلی اللہ علیہ وسلم سے عسکری مدد طلب کی تو آپ صلی اللہ علیہ وسلم نے ستر انصاری صحابہ کے ذریعے ان کی مدد فرمائی جنہیں ’قراء‘ (قرآن کے قاری) کہا جاتا تھا، یہ نفوسِ قدسیہ دن کے وقت لکڑیاں جمع کرتے اور راتیں اللہ کی عبادت و نماز میں گزارتے تھے، یہاں تک کہ جب وہ بئرِ معونہ کے مقام پر پہنچے تو ان قبائل نے ان کے ساتھ غداری کی اور انہیں شہید کر دیا، اسی غم میں «فَقَنَتَ رَسُولُ اللَّهِ صلى الله عليه وسلم شَهْرًا يَدْعُو عَلَيْهِمْ» ”رسول اللہ صلی اللہ علیہ وسلم نے ایک ماہ تک مسلسل (نمازوں میں) دعائے قنوت فرمائی اور ان قاتلوں کے خلاف بددعا کرتے رہے۔“ [مسند أبي يعلى الموصلي/مسند أنس بن مالك/حدیث: 2921]