سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم نے کبھی بھی کسی اونچی میز (خوان) پر کھانا نہیں کھایا اور نہ ہی کبھی چھوٹی پیالیوں میں تناول فرمایا، اور نہ ہی آپ صلی اللہ علیہ وسلم کے لیے کبھی باریک و نفیس روٹی پکائی گئی“، قتادہ رحمہ اللہ بیان کرتے ہیں کہ میں نے سیدنا انس رضی اللہ عنہ سے پوچھا: ”پھر آپ لوگ کس چیز پر بیٹھ کر کھانا کھایا کرتے تھے؟“ تو انہوں نے جواب دیا: ”چمڑے کے دسترخوانوں پر“، ابو موسیٰ رحمہ اللہ فرماتے ہیں کہ یہاں یونس سے مراد یونس بن ابی الفرات الاسکاف ہیں۔ [مسند أبي يعلى الموصلي/مسند أنس بن مالك/حدیث: 3014]