سیدنا انس بن مالک رضی اللہ عنہ سے روایت ہے کہ ایک یہودی رسول اللہ صلی اللہ علیہ وسلم کے پاس سے گزرا جبکہ آپ صلی اللہ علیہ وسلم اپنے صحابہ رضی اللہ عنہم کے ہمراہ تشریف فرما تھے، اس شخص نے (بظاہر) سلام کیا تو آپ صلی اللہ علیہ وسلم نے صحابہ سے دریافت فرمایا: ”کیا تم جانتے ہو کہ اس نے کیا کہا ہے؟“ انہوں نے عرض کیا کہ نہیں، آپ صلی اللہ علیہ وسلم نے فرمایا: ”اسے میرے پاس واپس بلا کر لاؤ“، جب وہ آیا تو آپ صلی اللہ علیہ وسلم نے اس سے پوچھا: ”کیا تم نے «السَّامُ عَلَيْكُمْ» ”تم پر موت واقع ہو“ کہا ہے؟“ اس نے اعتراف کرتے ہوئے کہا کہ جی ہاں، تب رسول اللہ صلی اللہ علیہ وسلم نے ارشاد فرمایا: ”جب اہل کتاب تمہیں سلام کریں تو تم جواب میں «وَعَلَيْكُمْ» ”اور تم پر بھی“ کہا کرو“۔ [مسند أبي يعلى الموصلي/مسند أنس بن مالك/حدیث: 3153]