سیدنا انس رضی اللہ عنہ سے روایت ہے کہ ربیع کی بہن ام حارثہ نے ایک شخص کو زخمی کردیا۔ فریقین نبی کریم صلی اللہ علیہ وسلم کے پاس مقدمہ لے کر آئے تو آپ صلی اللہ علیہ وسلم نے فرمایا: ”قصاص لیا جائے گا۔“ ام ربیع نے عرض کیا: اللہ کے رسول! کیا فلاں عورت سے قصاص لیا جائے گا؟ اللہ کی قسم! اس سے قصاص نہیں لیا جائے گا۔ نبی کریم صلی اللہ علیہ وسلم نے فرمایا: ”سبحان اللہ! اے ام ربیع، اللہ کی کتاب کا حکم قصاص ہی ہے۔“ انہوں نے کہا: اللہ کی قسم! اس سے کبھی قصاص نہیں لیا جائے گا۔ وہ برابر یہی کہتی رہیں، یہاں تک کہ دوسرے فریق نے دیت قبول کرلی۔ اس پر نبی کریم صلی اللہ علیہ وسلم نے فرمایا: ”اللہ کے بندوں میں کچھ ایسے بھی ہیں کہ اگر وہ اللہ کی قسم کھا لیں تو اللہ ان کی قسم پوری فرما دیتا ہے۔“ [مسند أبي يعلى الموصلي/مسند أنس بن مالك/حدیث: 3396]