ثابت رحمہ اللہ سے روایت ہے کہ کچھ لوگوں نے سیدنا انس رضی اللہ عنہ سے عرض کی: ”ہمارے لیے دعا فرمائیے“، تو انہوں نے یہ دعا کی: «اللَّهُمَّ ﴿آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ﴾ » ”اے اللہ! ہمیں دنیا میں بھی بھلائی عطا فرما اور آخرت میں بھی بھلائی عطا فرما اور ہمیں آگ کے عذاب سے بچا“، ان لوگوں نے عرض کی: ”کچھ مزید دعا فرمائیے“، تو انہوں نے دوبارہ وہی کلمات دہرائے، انہوں نے پھر کہا: ”کچھ اور اضافہ فرمائیے“، تو سیدنا انس رضی اللہ عنہ نے فرمایا: ”تم مزید کیا چاہتے ہو؟ میں نے تو تمہارے لیے دنیا اور آخرت کی تمام تر خیر مانگ لی ہے“، نیز سیدنا انس رضی اللہ عنہ نے بیان فرمایا کہ رسول اللہ صلی اللہ علیہ وسلم کثرت کے ساتھ یہ دعا مانگا کرتے تھے: «اللَّهُمَّ ﴿آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ﴾ » ”اے اللہ! ہمیں دنیا میں بھی بھلائی عطا فرما اور آخرت میں بھی بھلائی عطا فرما اور ہمیں آگ کے عذاب سے بچا“۔ [مسند أبي يعلى الموصلي/مسند أنس بن مالك/حدیث: 3397]