سیدنا انس بن مالک رضی اللہ عنہ سے روایت ہے کہ بارش کے فرشتے نے اپنے رب سے نبی کریم صلی اللہ علیہ وسلم کی زیارت کی اجازت طلب کی، چنانچہ اللہ تعالیٰ نے اسے اجازت عطا فرما دی۔ اس روز آپ صلی اللہ علیہ وسلم کی سیدہ ام سلمہ رضی اللہ عنہا کے ہاں باری تھی، تو نبی کریم صلی اللہ علیہ وسلم نے ارشاد فرمایا: ”اے ام سلمہ! دروازے کی نگرانی کرنا اور ہمارے پاس کسی کو داخل نہ ہونے دینا۔“ سیدنا انس رضی اللہ عنہ بیان کرتے ہیں کہ ابھی وہ دروازے پر مامور تھیں کہ اچانک سیدنا حسین بن علی رضی اللہ عنہما تشریف لائے اور تیزی سے بڑھ کر دروازہ کھولا اور اندر داخل ہو گئے۔ نبی کریم صلی اللہ علیہ وسلم انہیں اپنے سینہ مبارک سے لگانے اور پیار کرنے لگے، تب فرشتے نے عرض کیا: کیا آپ ان سے محبت کرتے ہیں؟ آپ صلی اللہ علیہ وسلم نے ارشاد فرمایا: ”جی ہاں۔“ فرشتے نے کہا: یقیناً آپ کی امت انہیں عنقریب شہید کر دے گی، اور اگر آپ چاہیں تو میں آپ کو وہ مقام دکھا دوں جہاں انہیں شہید کیا جائے گا۔ آپ صلی اللہ علیہ وسلم نے فرمایا: ”ٹھیک ہے۔“ اس پر فرشتے نے اس مقام کی مٹی سے ایک مٹھی بھری جہاں وہ شہید ہوئے تھے اور آپ صلی اللہ علیہ وسلم کو دکھا دی، وہ بھربھری مٹی یا سرخ مٹی تھی، جسے سیدہ ام سلمہ رضی اللہ عنہا نے لے کر اپنے کپڑے کے پلو میں باندھ لیا۔ ثابت رحمہ اللہ کہتے ہیں کہ ہم یہ کہا کرتے تھے کہ وہ جگہ کربلا ہے۔ [مسند أبي يعلى الموصلي/مسند أنس بن مالك/حدیث: 3402]