سیدنا انس رضی اللہ عنہ سے روایت ہے کہ سیدہ صفیہ رضی اللہ عنہا کو یہ اطلاع ملی کہ سیدہ حفصہ رضی اللہ عنہا نے ان کے متعلق کہا ہے کہ وہ ایک یہودی کی بیٹی ہیں، چنانچہ نبی اکرم صلی اللہ علیہ وسلم ان کے پاس تشریف لائے تو وہ رو رہی تھیں، آپ صلی اللہ علیہ وسلم نے دریافت فرمایا: ”تمہیں کس بات نے رلایا ہے؟“ انہوں نے عرض کی کہ سیدہ حفصہ رضی اللہ عنہا نے مجھے کہا ہے کہ میں ایک یہودی کی بیٹی ہوں، تو نبی اکرم صلی اللہ علیہ وسلم نے ارشاد فرمایا: ”بے شک تم ایک نبی کی صاحبزادی ہو، تمہارے چچا بھی نبی تھے اور تم ایک نبی کے نکاح میں ہو، پھر وہ تم پر کس بنیاد پر فخر جتلاتی ہیں؟“ پھر آپ صلی اللہ علیہ وسلم نے سیدہ حفصہ رضی اللہ عنہا سے مخاطب ہو کر فرمایا: ”اے حفصہ! اللہ سے ڈرو۔“ [مسند أبي يعلى الموصلي/مسند أنس بن مالك/حدیث: 3437]