سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم عمرۃ القضاء کے موقع پر مکہ مکرمہ میں داخل ہوئے تو سیدنا عبداللہ بن رواحہ رضی اللہ عنہ آپ صلی اللہ علیہ وسلم کے آگے آگے چل رہے تھے اور یہ اشعار پڑھ رہے تھے: ”اے کفار کی اولاد! آپ صلی اللہ علیہ وسلم کا راستہ چھوڑ دو، آج ہم (قرآن کی) تاویل پر تمہیں ایسی ضربیں لگائیں گے جو سروں کو ان کے ٹھکانوں سے جدا کر دیں گی اور جگری دوست کو اس کے رفیق سے غافل کر دیں گی“، اس پر سیدنا عمر رضی اللہ عنہ نے ان سے فرمایا: ”اے ابن رواحہ! اللہ کے مقدس حرم میں اور رسول اللہ صلی اللہ علیہ وسلم کے سامنے تم یہ اشعار پڑھ رہے ہو؟“ تو رسول اللہ صلی اللہ علیہ وسلم نے ارشاد فرمایا: ”اے عمر! اسے (پڑھنے) دو، اس ذات کی قسم جس کے قبضۂ قدرت میں میری جان ہے! اس کا یہ کلام ان (مشرکین) پر تیروں کے لگنے سے بھی زیادہ سخت ہے“۔ [مسند أبي يعلى الموصلي/مسند أنس بن مالك/حدیث: 3440]