سیدنا انس بن مالک رضی اللہ عنہ اور سیدنا ابن عمر رضی اللہ عنہما سے روایت ہے کہ جب رسول اللہ صلی اللہ علیہ وسلم غزوۂ احد سے واپس تشریف لائے تو آپ صلی اللہ علیہ وسلم نے انصار کی خواتین کے (اپنے شہدا پر) رونے کی آوازیں سنیں تو آپ صلی اللہ علیہ وسلم نے (حسرت کے طور پر) ارشاد فرمایا: ”لیکن سیدنا حمزہ رضی اللہ عنہ کے لیے رونے والیاں کوئی نہیں ہیں۔“ جب یہ بات انصار کی خواتین تک پہنچی تو وہ سیدنا حمزہ رضی اللہ عنہ کے غم میں رونے لگیں، پھر رسول اللہ صلی اللہ علیہ وسلم استراحت فرما ہوئے اور جب بیدار ہوئے تو وہ اب بھی رو رہی تھیں، تو آپ صلی اللہ علیہ وسلم نے (اظہارِ تعجب و ہمدردی کے طور پر) فرمایا: ”افسوس ان پر! کیا وہ آج سارا دن سے اب تک مسلسل رو ہی رہی ہیں؟ انہیں کہہ دو کہ (ابھی) رو لیں، لیکن آج کے دن کے بعد کسی فوت ہونے والے پر (اس طرح) ہرگز نہ روئیں۔“ [مسند أبي يعلى الموصلي/مسند أنس بن مالك/حدیث: 3576]