سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے سیدنا ابو طلحہ رضی اللہ عنہ سے فرمایا: ”اپنے لڑکوں میں سے کوئی لڑکا میرے لیے تلاش کرو جو میری خدمت کیا کرے“، چنانچہ سیدنا ابو طلحہ رضی اللہ عنہ مجھے اپنے پیچھے سواری پر بٹھا کر (سفر پر) لے نکلے، پس جب بھی رسول اللہ صلی اللہ علیہ وسلم کہیں پڑاؤ فرماتے تو میں آپ صلی اللہ علیہ وسلم کی خدمت بجا لاتا، اور میں آپ صلی اللہ علیہ وسلم کو کثرت سے یہ دعا مانگتے ہوئے سنتا تھا: «اللَّهُمَّ إِنِّي أَعُوذُ بِكَ مِنَ الْهَمِّ وَالْحَزَنِ، وَالْعَجْزِ وَالْكَسَلِ، وَالْبُخْلِ وَالْجُبْنِ، وَضَلَعِ الدَّيْنِ، وَغَلَبَةِ الرِّجَالِ» ”اے اللہ! میں تیری پناہ چاہتا ہوں فکر اور غم سے، عاجزی اور سستی سے، بخل اور بزدلی سے، قرض کے بوجھ سے اور لوگوں کے غلبہ (و تسلط) سے“۔ میں برابر آپ صلی اللہ علیہ وسلم کی خدمت کرتا رہا یہاں تک کہ ہم خیبر سے واپس لوٹے، اور آپ صلی اللہ علیہ وسلم سیدہ صفیہ بنت حیی رضی اللہ عنہا کو ساتھ لے کر آئے جنہیں آپ صلی اللہ علیہ وسلم نے (مالِ غنیمت میں سے) اپنے لیے منتخب فرما لیا تھا، میں دیکھتا تھا کہ آپ صلی اللہ علیہ وسلم اپنے پیچھے ایک چوغے یا چادر کو لپیٹ کر (سیدہ رضی اللہ عنہا کے بیٹھنے کے لیے) گدی سی بنا دیتے، پھر انہیں اپنے پیچھے سوار کر لیتے، یہاں تک کہ جب ہم مقامِ صہباء پر پہنچے تو آپ صلی اللہ علیہ وسلم نے چمڑے کے دسترخوان پر حَیس (کھجور، گھی اور پنیر سے بنا ملیدہ) تیار کروایا، پھر مجھے بھیجا تو میں نے کچھ لوگوں کو بلایا، انہوں نے کھانا کھایا، اور یہی سیدہ صفیہ رضی اللہ عنہا کے ساتھ آپ صلی اللہ علیہ وسلم کی شبِ زفاف (کا ولیمہ) تھا۔ پھر آپ صلی اللہ علیہ وسلم (مدینہ کی طرف) روانہ ہوئے، یہاں تک کہ جب اُحد پہاڑ نظر آیا تو فرمایا: ”یہ وہ پہاڑ ہے جو ہم سے محبت کرتا ہے اور ہم اس سے محبت کرتے ہیں“، پھر جب آپ صلی اللہ علیہ وسلم مدینہ کے قریب پہنچ کر اس پر نظر ڈالی تو یوں دعا فرمائی: «اللَّهُمَّ إِنِّي أُحَرِّمُ مَا بَيْنَ جَبَلَيْهَا مِثْلَ مَا حَرَّمَ إِبْرَاهِيمُ مَكَّةَ، اللَّهُمَّ بَارِكْ لَهُمْ فِي مُدِّهِمْ وَصَاعِهِمْ» ”اے اللہ! میں اس (مدینہ) کے دونوں پہاڑوں کے درمیان والے علاقے کو اسی طرح حرم قرار دیتا ہوں جس طرح ابراہیم علیہ السلام نے مکہ کو حرم قرار دیا تھا، اے اللہ! ان کے مُد اور صاع (یعنی ناپ تول کے پیمانوں) میں برکت عطا فرما“۔ [مسند أبي يعلى الموصلي/مسند أنس بن مالك/حدیث: 3703]