سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نماز کے لیے کھڑے ہوئے تو ایک شخص آپ صلی اللہ علیہ وسلم کے (نماز شروع کر دینے کے) بعد آیا اور اس نے تیز قدموں سے چلنے میں جلدی کی، چنانچہ وہ لوگوں تک اس حال میں پہنچا کہ اس کا سانس پھول رہا تھا یا وہ ہانپ رہا تھا، پس جب وہ صف میں پہنچا تو اس نے کہا: «الْحَمْدُ لِلَّهِ حَمْدًا كَثِيرًا طَيِّبًا مُبَارَكًا فِيهِ» ”تمام تعریفیں اللہ ہی کے لیے ہیں، ایسی تعریف جو کثیر، پاکیزہ اور بابرکت ہو“، پھر جب نبی کریم صلی اللہ علیہ وسلم نماز مکمل کر چکے تو دریافت فرمایا: ”بات کرنے والا -یا ان کلمات کو کہنے والا- کون ہے؟“ لوگ خاموش رہے، آپ صلی اللہ علیہ وسلم نے دوبارہ وہی بات پوچھی اور فرمایا: ”وہ شخص کون ہے؟ یقیناً اس نے کوئی بری بات نہیں کہی بلکہ بھلائی کی بات ہی کہی ہے“، تو اس آدمی نے عرض کی: اے اللہ کے رسول! میں آیا تو میں نے چلنے میں تیزی کی تھی، چنانچہ جب میں صف تک پہنچا تو میرا سانس پھول رہا تھا یا میں ہانپ رہا تھا تو میں نے وہ کلمات کہے جو کہے تھے، آپ صلی اللہ علیہ وسلم نے ارشاد فرمایا: ”بلاشبہ میں نے بارہ فرشتوں کو دیکھا کہ وہ ایک دوسرے سے سبقت لے جانے کی کوشش کر رہے تھے کہ ان میں سے کون ان کلمات کو (بارگاہِ الٰہی میں) بلند کرے“، پھر آپ صلی اللہ علیہ وسلم نے فرمایا: ”جب تم میں سے کوئی نماز کے لیے آئے تو اسے چاہیے کہ وہ وقار اور سکون کے ساتھ چل کر آئے، پس نماز کا جو حصہ (امام کے ساتھ) پا لے اسے ادا کرے اور جو رہ جائے اسے (بعد میں) پورا کر لے۔“ [مسند أبي يعلى الموصلي/مسند أنس بن مالك/حدیث: 3876]