سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں جنت میں داخل ہوا تو وہاں میں نے سونے کا ایک محل دیکھا، میں نے دریافت کیا کہ یہ محل کس کا ہے؟ فرشتوں نے بتایا کہ یہ قریش کے ایک نوجوان کا ہے۔ میں نے گمان کیا کہ شاید وہ میرے ہی لیے ہے، چنانچہ میں نے پوچھا کہ وہ نوجوان کون ہے؟ انہوں نے جواب دیا کہ وہ سیدنا عمر بن خطاب رضی اللہ عنہ ہیں۔ (پھر آپ صلی اللہ علیہ وسلم نے فرمایا:) اے ابوحفص! اگر مجھے آپ کی غیرت کا علم نہ ہوتا تو میں اس محل میں ضرور داخل ہو جاتا۔“ اس پر سیدنا عمر بن خطاب رضی اللہ عنہ نے عرض کی: ”اے اللہ کے رسول صلی اللہ علیہ وسلم ! میں دوسروں پر تو غیرت کر سکتا ہوں، مگر آپ صلی اللہ علیہ وسلم کے معاملے میں تو میں ہرگز غیرت نہیں کر سکتا۔“ [مسند أبي يعلى الموصلي/مسند أنس بن مالك/حدیث: 4182]