سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم جب بھی سفر پر روانہ ہوتے یا کسی غزوے کے لیے تشریف لے جاتے تو روزانہ اپنے صحابہ میں سے کسی ایک شخص کو اپنی سواری پر اپنے پیچھے بٹھا لیا کرتے تھے، چنانچہ (ایک مرتبہ) سیدنا معاذ بن جبل رضی اللہ عنہ رسول اللہ صلی اللہ علیہ وسلم کے ہم ردیف تھے، آپ صلی اللہ علیہ وسلم نے انہیں پکارا جب کہ وہ آپ کے پیچھے سوار تھے اور فرمایا: ”اے معاذ بن جبل!“ انہوں نے عرض کیا: ” «لَبَّيْكَ يَا رَسُولَ اللَّهِ» ”میں آپ کی جناب میں حاضر ہوں اے اللہ کے رسول!“۔“ آپ صلی اللہ علیہ وسلم نے دریافت فرمایا: ”کیا تم جانتے ہو کہ بندوں پر اللہ کا کیا حق ہے؟ (وہ حق یہ ہے) کہ وہ اس بات کی شہادت دیں کہ اللہ کے سوا کوئی معبودِ برحق نہیں اور محمد ( صلی اللہ علیہ وسلم ) اللہ کے بندے اور اس کے رسول ہیں، اور یہ کہ وہ محض اسی کی عبادت کریں اور اس کے ساتھ کسی بھی چیز کو شریک نہ ٹھہرائیں“، آپ صلی اللہ علیہ وسلم نے اس ارشاد کو تین مرتبہ دہرایا، پھر (دوبارہ) پکار کر فرمایا: ”اے معاذ!“ انہوں نے عرض کیا: ” «لَبَّيْكَ يَا رَسُولَ اللَّهِ» ”میں آپ کی خدمت میں حاضر ہوں اے اللہ کے رسول!“۔“ آپ صلی اللہ علیہ وسلم نے دریافت فرمایا: ”کیا تم جانتے ہو کہ جب بندے یہ (حق) ادا کر لیں تو اللہ پر ان کا کیا حق ثابت ہو جاتا ہے؟“ انہوں نے عرض کیا: ”اللہ اور اس کے رسول ہی بہتر جانتے ہیں“، آپ صلی اللہ علیہ وسلم نے ارشاد فرمایا: ”بے شک جب بندے یہ کر لیں تو اللہ پر ان کا حق یہ ہے کہ وہ انہیں عذاب نہ دے اور انہیں جنت میں داخل فرمائے“۔ [مسند أبي يعلى الموصلي/مسند أنس بن مالك/حدیث: 4239]