سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم کی علالت کے دوران آپ کے صحابہ کرام رضی اللہ عنہم آپ کی خدمت میں حاضر ہوئے، اس وقت آپ صلی اللہ علیہ وسلم بیٹھ کر نماز ادا فرما رہے تھے تو وہ آپ کے پیچھے کھڑے ہو کر نماز پڑھنے لگے، آپ صلی اللہ علیہ وسلم نے انہیں اپنے ہاتھ سے اشارہ فرمایا کہ ”بیٹھ جاؤ“، چنانچہ وہ بیٹھ گئے، پھر جب نبی کریم صلی اللہ علیہ وسلم نماز سے فارغ ہوئے تو ارشاد فرمایا: ”امام اس لیے بنایا جاتا ہے کہ اس کی اقتدا کی جائے، لہٰذا جب وہ رکوع کرے تو تم بھی رکوع کرو، اور جب وہ سجدہ کرے تو تم بھی سجدہ کرو، اگر وہ کھڑے ہو کر نماز پڑھے تو تم بھی کھڑے ہو کر پڑھو اور اگر وہ بیٹھ کر نماز پڑھے تو تم سب بھی بیٹھ کر نماز ادا کرو“۔ [مسند أبي يعلى الموصلي/مسند عائشة/حدیث: 4496]