سیدنا عبداللہ رضی اللہ عنہ سے روایت ہے کہ نبی کریم صلی اللہ علیہ وسلم نے عورتوں سے مخاطب ہو کر ارشاد فرمایا: ”تم صدقہ و خیرات کیا کرو کیونکہ (میں نے دیکھا ہے کہ) تم جہنم والوں میں بکثرت ہو“، اس پر ایک ایسی خاتون نے جو بلند مرتبہ یا اشرافیہ سے تعلق نہیں رکھتی تھی عرض کیا کہ (اے اللہ کے رسول صلی اللہ علیہ وسلم !) ایسا کیوں ہے؟ یا ہم کس وجہ سے وہاں زیادہ ہوں گی؟ آپ صلی اللہ علیہ وسلم نے ارشاد فرمایا: ”تم لعن طعن بہت زیادہ کرتی ہو اور اپنے شوہر کی ناشکری کرتی ہو، اور میں نے عقل و دین میں ناقص ہونے کے باوجود تم عورتوں سے بڑھ کر کسی کو بڑے بڑے عقل مند اور صاحبِ اختیار مردوں کی عقل پر غالب آنے والا نہیں دیکھا“، دریافت کیا گیا کہ ان کی عقل کا نقصان کیا ہے؟ آپ صلی اللہ علیہ وسلم نے فرمایا: ”اللہ تعالیٰ نے دو عورتوں کی گواہی کو ایک مرد کی گواہی کے برابر قرار دیا ہے“، پھر پوچھا گیا کہ ان کے دین کا نقصان کیا ہے؟ آپ صلی اللہ علیہ وسلم نے فرمایا: ”عورت (ایامِ مخصوصہ میں) کچھ دن، مجھے نہیں معلوم کتنے، نماز ادا نہیں کرتی“۔ [مسند أبي يعلى الموصلي/مسند عبد الله بن مسعود/حدیث: 5284]