سیدنا عبداللہ رضی اللہ عنہ سے روایت ہے کہ جب رسول اللہ صلی اللہ علیہ وسلم حدیبیہ سے واپس تشریف لائے تو ایک مقام پر پڑاؤ ڈالا اور رات کے آخری پہر آرام فرمایا، پھر آپ صلی اللہ علیہ وسلم نے دریافت فرمایا: ”کون ہے جو ہمارا پہرہ دے گا؟“ سیدنا عبداللہ رضی اللہ عنہ بیان کرتے ہیں کہ میں نے عرض کیا: میں، تو رسول اللہ صلی اللہ علیہ وسلم نے فرمایا: ”تم سو جاؤ گے“، آپ صلی اللہ علیہ وسلم نے یہ بات دو یا تین مرتبہ فرمائی، پھر فرمایا: ”اچھا، تو پھر تم (پہرہ دو)“، چنانچہ میں نے ان کا پہرہ دیا یہاں تک کہ جب صبح کا وقت قریب ہوا تو مجھ پر وہی (نیند) غالب آگئی جس کا تذکرہ رسول اللہ صلی اللہ علیہ وسلم نے فرمایا تھا، پھر ہماری آنکھ اس وقت کھلی جب ہماری پیٹھوں پر سورج کی تپش پڑنے لگی، پھر رسول اللہ صلی اللہ علیہ وسلم بیدار ہوئے اور آپ صلی اللہ علیہ وسلم نے (وضو وغیرہ) ویسے ہی کیا جیسے آپ صلی اللہ علیہ وسلم کیا کرتے تھے، پھر آپ صلی اللہ علیہ وسلم نے صبح کی نماز پڑھائی اور اس کے بعد ارشاد فرمایا: ”اللہ تعالیٰ اگر چاہتا تو تم اس (نماز) سے نہ سوتے، لیکن (یہ اس لیے ہوا کہ) تمہارے بعد آنے والوں کے لیے ایک نمونہ بن جائے، پس جو شخص سو جائے یا بھول جائے اس کے لیے یہی (طریقہ کار) ہے“۔ [مسند أبي يعلى الموصلي/مسند عبد الله بن مسعود/حدیث: 5285]