سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”موسمِ حج (یا اجتماعِ عام) میں میرے سامنے تمام امتیں پیش کی گئیں، تو میں نے اپنی امت کو دیکھا، پھر میں نے انہیں (دوبارہ غور سے) دیکھا تو مجھے ان کی کثرت اور ان کی شان و ہیئت نے بہت خوش کیا کہ انہوں نے میدان اور پہاڑ (ہر جگہ) کو بھر رکھا تھا، تب اللہ تعالیٰ نے دریافت فرمایا: اے محمد ( صلی اللہ علیہ وسلم )! کیا آپ راضی ہو گئے؟ آپ صلی اللہ علیہ وسلم فرماتے ہیں کہ میں نے عرض کیا: جی ہاں، تو اللہ تعالیٰ نے فرمایا: ان لوگوں میں سے ستر ہزار ایسے ہیں جو بغیر حساب کے جنت میں داخل ہوں گے، یہ وہ لوگ ہیں جو دم نہیں کرواتے، آگ سے داغ کر علاج نہیں کرواتے اور اپنے رب ہی پر توکل کرتے ہیں۔“ تب سیدنا عکاشہ بن محصن رضی اللہ عنہ کھڑے ہوئے اور عرض گزار ہوئے: اے اللہ کے رسول صلی اللہ علیہ وسلم ! اللہ تعالیٰ سے دعا فرمائیں کہ وہ مجھے ان میں شامل کر دے، چنانچہ آپ صلی اللہ علیہ وسلم نے ان کے لیے دعا فرمائی، پھر ایک اور صاحب کھڑے ہوئے اور عرض کیا: اے اللہ کے رسول صلی اللہ علیہ وسلم ! اللہ سے دعا فرمائیں کہ وہ مجھے بھی ان میں شامل کر دے، تو رسول اللہ صلی اللہ علیہ وسلم نے ارشاد فرمایا: ”عکاشہ اس معاملے میں تم سے سبقت لے گئے ہیں۔“ [مسند أبي يعلى الموصلي/مسند عبد الله بن مسعود/حدیث: 5340]