حبیب بن ابی ملیکہ رحمہ اللہ بیان کرتے ہیں کہ میں سیدنا ابن عمر رضی اللہ عنہما کے پاس بیٹھا ہوا تھا کہ ایک شخص ان کے پاس آیا اور سوال کیا: ”کیا سیدنا عثمان رضی اللہ عنہ غزوہ بدر میں حاضر تھے؟“ انہوں نے جواب دیا: ”نہیں۔“ اس نے پوچھا: ”کیا وہ بیعتِ رضوان میں شریک تھے؟“ انہوں نے فرمایا: ”نہیں۔“ اس نے پھر پوچھا: ”کیا وہ ان لوگوں میں سے تھے جو اس دن پیٹھ پھیر گئے تھے جب دو جماعتوں کا آمنا سامنا ہوا تھا؟“ انہوں نے فرمایا: ”ہاں۔“ وہ شخص وہاں سے چل دیا تو سیدنا ابن عمر رضی اللہ عنہما سے کہا گیا: ”اے ابو عبدالرحمن! یہ شخص اب یہ تشہیر کرے گا کہ آپ نے سیدنا عثمان رضی اللہ عنہ کی تنقیص کی ہے۔“ آپ نے فرمایا: ”اسے میرے پاس واپس لاؤ۔“ پھر آپ نے اس سے فرمایا: ”رہی بات غزوہ بدر کی تو رسول اللہ صلی اللہ علیہ وسلم نے انہیں اپنی ایک ضرورت (یعنی رسول اللہ صلی اللہ علیہ وسلم کی صاحبزادی کی تیمار داری) کے باعث پیچھے چھوڑا تھا، پھر رسول اللہ صلی اللہ علیہ وسلم نے مالِ غنیمت میں ان کا باقاعدہ حصہ بھی مقرر کیا، جبکہ آپ صلی اللہ علیہ وسلم کسی غیر حاضر کا حصہ مقرر نہیں فرماتے تھے (تاوقتیکہ وہ کسی شرعی مہم پر نہ ہو)۔ رہی بات بیعتِ رضوان کی تو رسول اللہ صلی اللہ علیہ وسلم نے انہیں اہلِ مکہ کی طرف (سفیر بنا کر) بھیجا تھا، پھر رسول اللہ صلی اللہ علیہ وسلم نے اپنے دونوں ہاتھ نکالے اور ایک ہاتھ کو دوسرے پر مار کر فرمایا: ”یہ عثمان کی طرف سے ہے“، پس رسول اللہ صلی اللہ علیہ وسلم کا ہاتھ سیدنا عثمان رضی اللہ عنہ کے ہاتھ سے کہیں بہتر ہے۔ اور رہا وہ معاملہ جب دو جماعتیں باہم ٹکرائی تھیں (یعنی غزوہ احد) تو اللہ تعالیٰ ان کے متعلق معافی کا اعلان فرما چکا ہے؛ اب جاؤ اور (یہ باتیں لے کر) میرے خلاف جو زور لگا سکتے ہو لگا لو۔“ [مسند أبي يعلى الموصلي/مسند عبد الله بن عمر/حدیث: 5599]