سعید بن جبیر رحمہ اللہ بیان کرتے ہیں کہ میں نے سیدنا ابن عمر رضی اللہ عنہما کو یہ فرماتے ہوئے سنا کہ رسول اللہ صلی اللہ علیہ وسلم نے لعان کرنے والے میاں بیوی سے مخاطب ہو کر فرمایا: ”تم دونوں کا (حتمی) حساب اللہ تعالیٰ کے سپرد ہے، تم میں سے کوئی ایک یقیناً جھوٹا ہے، اب تمہارا اس عورت پر کوئی شرعی حق باقی نہیں رہا۔“ اس شخص نے عرض کیا: اے اللہ کے رسول صلی اللہ علیہ وسلم ! میرا وہ مال (مہر) جو میں نے اسے دیا تھا، اس کا کیا بنے گا؟ آپ صلی اللہ علیہ وسلم نے ارشاد فرمایا: ”تمہارے لیے اب کوئی مال (واپسی) نہیں ہے؛ اگر تم نے اس پر (بدکاری کا) جو الزام لگایا ہے اس میں تم سچے ہو تو وہ مال اس کے بدلے میں ہے جو تم نے اس کی شرمگاہ کو اپنے لیے حلال کیا تھا، اور اگر تم نے اس پر جھوٹا بہتان باندھا ہے تو پھر تو وہ مال تمہارے لیے اور بھی دور کی بات (یعنی ناممکن الحصول) ہے۔“ [مسند أبي يعلى الموصلي/مسند عبد الله بن عمر/حدیث: 5651]