سیدنا عمیر العبدی رضی اللہ عنہ سے روایت ہے کہ نبی کریم صلی اللہ علیہ وسلم کے پاس عبد القیس کا وفد آیا، جب انہوں نے واپسی کا ارادہ کیا تو (باہم) کہنے لگے کہ تم نے نبی کریم صلی اللہ علیہ وسلم سے سنی ہوئی ہر بات تو یاد کر لی ہے، اب ان سے نبیذ کے بارے میں بھی دریافت کر لو، چنانچہ وہ آپ صلی اللہ علیہ وسلم کی خدمت میں حاضر ہوئے اور عرض کی: ”اے اللہ کے رسول! ہم ایک ایسی زمین میں رہتے ہیں جہاں کی آب و ہوا ناگوار اور وبائی ہے، وہاں اس مشروب کے سوا کوئی چیز ہمیں راس نہیں آتی“، آپ صلی اللہ علیہ وسلم نے دریافت فرمایا: ”تمہارا مشروب کیا ہے؟“ انہوں نے عرض کی: ”نبیذ“، آپ صلی اللہ علیہ وسلم نے پوچھا: ”تم اسے کس برتن میں پیتے ہو؟“ انہوں نے عرض کی: ”نقیر (لکڑی کے کھود کر بنائے گئے برتن) میں“، تو آپ صلی اللہ علیہ وسلم نے ارشاد فرمایا: ”تم نقیر میں نہ پیا کرو“، وہ آپ صلی اللہ علیہ وسلم کے پاس سے نکلے تو (آپس میں) کہنے لگے: اللہ کی قسم! ہماری قوم اس (پابندی) پر ہم سے اتفاق نہیں کرے گی، چنانچہ وہ دوبارہ واپس آئے اور سوال کیا تو آپ صلی اللہ علیہ وسلم نے انہیں پھر ویسا ہی حکم دیا اور فرمایا: ”تم نقیر میں نہ پیا کرو، (کیونکہ اس کے نشے میں) تم میں سے کوئی آدمی اپنے چچا زاد بھائی کو ایسی ضرب لگا دیتا ہے کہ وہ قیامت کے دن تک لنگڑا ہی رہتا ہے“، راوی کہتے ہیں کہ وہ (یہ سن کر) ہنس پڑے تو آپ صلی اللہ علیہ وسلم نے دریافت فرمایا: ”تم کس بات پر ہنس رہے ہو؟“ انہوں نے عرض کی: ”اے اللہ کے رسول! اس ذات کی قسم جس نے آپ کو حق کے ساتھ مبعوث فرمایا ہے! ہم نے اپنے ایک نقیر میں (نبیذ) پی تھی تو ہم میں سے ایک شخص دوسرے کی طرف اٹھا اور اسے ایسی ضرب لگائی کہ وہ واقعی قیامت تک کے لیے لنگڑا ہو گیا“۔ [مسند أبي يعلى الموصلي/حديث عمير العبدي/حدیث: 6851]