مجاہد رحمہ اللہ سے روایت ہے کہ سیدہ ام سلمہ رضی اللہ عنہا نے عرض کیا: ”اے اللہ کے رسول صلی اللہ علیہ وسلم ! مرد تو جہاد و قتال میں حصہ لیتے ہیں مگر ہم جہاد نہیں کرتیں، اور ہمیں وراثت میں بھی صرف نصف حصہ ملتا ہے“، اس پر اللہ عزوجل نے یہ آیت نازل فرمائی: ﴿وَلَا تَتَمَنَّوْا مَا فَضَّلَ اللَّهُ بِهِ بَعْضُكُمْ عَلَى بَعْضٍ﴾ ”اور اس چیز کی تمنا نہ کرو جس کے ذریعے اللہ نے تم میں سے بعض کو بعض پر فضیلت دی ہے“، نیز راوی کہتے ہیں کہ انہی کے بارے میں یہ آیت بھی نازل ہوئی: ﴿إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ﴾ ”بے شک مسلمان مرد اور مسلمان عورتیں، اور مومن مرد اور مومن عورتیں“ آخرِ آیت تک۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 6959]