سیدہ ام سلمہ رضی اللہ عنہا، جو نبی کریم صلی اللہ علیہ وسلم کی زوجہ مطہرہ ہیں، سے روایت ہے کہ میں نبی کریم صلی اللہ علیہ وسلم کے پاس بیٹھی ہوئی تھی کہ دو آدمی آپ صلی اللہ علیہ وسلم کے پاس ایسی چیزوں کے بارے میں جھگڑا لے کر آئے جو عرصہ دراز گزرنے کی وجہ سے مٹ چکی تھیں، تو رسول اللہ صلی اللہ علیہ وسلم نے ارشاد فرمایا: ”میں تمہارے درمیان ان امور میں فیصلہ کرتا ہوں جن کے بارے میں مجھ پر کوئی وحی نازل نہیں ہوئی، پس میں کسی کی ایسی دلیل کی بنیاد پر جسے میں (بظاہر) درست سمجھوں، اس کے حق میں فیصلہ کر دوں اور وہ اس کے ذریعے اپنے بھائی کے مال کا کچھ حصہ حاصل کر لے، تو وہ درحقیقت آگ کا ایک ٹکڑا حاصل کر رہا ہے جو قیامت کے دن اس کی گردن میں طوق بن جائے گا“، یہ سن کر وہ دونوں آدمی رونے لگے اور عرض کرنے لگے: ”اے اللہ کے رسول صلی اللہ علیہ وسلم ! میرا وہ حق جس کا میں مطالبہ کر رہا ہوں وہ میرے بھائی کا ہے“، تب رسول اللہ صلی اللہ علیہ وسلم نے ارشاد فرمایا: ”ایسا نہیں، بلکہ تم دونوں جاؤ اور (باہمی رضامندی سے مال) تقسیم کرو اور حق و انصاف کا قصد کرو، پھر تم میں سے ہر ایک اپنے ساتھی کو (اپنے حق سے) حلال کر دے (یعنی معاف کر دے)“۔ [مسند أبي يعلى الموصلي/مسند أم سلمة زوج النبي صلى الله عليه وسلم/حدیث: 7027]