سیدہ میمونہ رضی اللہ عنہا سے روایت ہے کہ نبی کریم صلی اللہ علیہ وسلم کا گزر ایک ایسی بکری کے پاس سے ہوا جو سیدہ میمونہ رضی اللہ عنہا کی ایک آزاد کردہ لونڈی کی تھی اور اسے وہ صدقے میں ملی تھی، تو آپ صلی اللہ علیہ وسلم نے (اسے مردہ دیکھ کر) ارشاد فرمایا: ”ان لوگوں نے اس کی کھال کیوں نہ اتار لی کہ اسے دباغت دے کر اس سے فائدہ اٹھاتے؟“ صحابہ کرام نے عرض کی: اے اللہ کے رسول! وہ تو مردار ہے، تو آپ صلی اللہ علیہ وسلم نے ارشاد فرمایا: ”حقیقت میں تو صرف اس کا کھانا حرام کیا گیا ہے۔“ ابویعقوب رحمہ اللہ کہتے ہیں کہ سفیان رحمہ اللہ نے اس مسئلے میں اس آیتِ مبارکہ ﴿قُلْ لَا أَجِدُ فِي مَا أُوحِيَ إِلَيَّ مُحَرَّمًا عَلَى طَاعِمٍ يَطْعَمُهُ﴾ ”آپ فرما دیں کہ جو وحی میری طرف کی گئی ہے اس میں مَیں کسی کھانے والے پر کوئی چیز حرام نہیں پاتا جسے وہ کھائے“ سے بڑا بصیرت افروز استدلال کیا، سفیان رحمہ اللہ نے فرمایا کہ اگر (اس باب میں) صرف یہی ایک آیت ہوتی تو مَیں اسی سے مردار کے کھانے کے فاسد اور ناجائز ہونے پر استدلال کرتا۔ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7100]