سعید بن المسیب رحمہ اللہ سے روایت ہے کہ سیدنا جبیر بن مطعم رضی اللہ عنہ نے بیان کیا کہ جب رسول اللہ صلی اللہ علیہ وسلم نے ذوی القربیٰ کا حصہ بنو ہاشم اور بنو مطلب کے درمیان تقسیم فرمایا تو میں اور سیدنا عثمان رضی اللہ عنہ آپ صلی اللہ علیہ وسلم کی خدمت میں حاضر ہوئے اور عرض کی: ”اے اللہ کے رسول! یہ بنو ہاشم ہیں، ان کی فضیلت کا تو انکار نہیں کیا جا سکتا کیونکہ اللہ عزوجل نے آپ کو انہی میں مبعوث فرما کر انہیں یہ بلند مقام عطا فرمایا ہے، لیکن بنو مطلب کے بارے میں آپ کی کیا رائے ہے کہ آپ نے انہیں تو (مال) عطا فرمایا مگر ہمیں محروم رکھا، حالانکہ آپ سے نسبت کے معاملے میں ہم اور وہ ایک ہی درجے میں ہیں؟“ تو آپ صلی اللہ علیہ وسلم نے ارشاد فرمایا: ”انہوں نے دورِ جاہلیت ہو یا اسلام، کسی حال میں بھی میرا ساتھ نہیں چھوڑا، بلاشبہ بنو ہاشم اور بنو مطلب ایک ہی چیز ہیں“ اور آپ صلی اللہ علیہ وسلم نے (یہ کہتے ہوئے) اپنے دونوں ہاتھوں کی انگلیوں کو ایک دوسرے میں پیوست فرمایا۔ [مسند أبي يعلى الموصلي/حديث جبير بن مطعم، عن النبي صلى الله عليه وسلم/حدیث: 7399]