سیدنا واثلہ بن اسقع رضی اللہ عنہ بیان کرتے ہیں کہ میں مسجدِ خیف میں رسول اللہ صلی اللہ علیہ وسلم کے قریب ہوا تو آپ صلی اللہ علیہ وسلم کے صحابہ رضی اللہ عنہم نے مجھ سے کہا کہ اے واثلہ! پیچھے ہٹ جاؤ، یعنی رسول اللہ صلی اللہ علیہ وسلم کے سامنے سے ہٹ جاؤ، تو رسول اللہ صلی اللہ علیہ وسلم نے ارشاد فرمایا: ”اسے چھوڑ دو، یہ تو کچھ پوچھنے آیا ہے“۔ سیدنا واثلہ رضی اللہ عنہ کہتے ہیں کہ پھر میں قریب ہوا اور عرض کی: اے اللہ کے رسول صلی اللہ علیہ وسلم ! میرے ماں باپ آپ پر قربان ہوں، آپ ہمیں کسی ایسی بات کے بارے میں بتائیں جسے ہم آپ کے بعد (مشعلِ راہ کے طور پر) اپنا لیں، تو آپ صلی اللہ علیہ وسلم نے فرمایا: ”تمہارا اپنا نفس تمہیں فتویٰ دے گا“۔ میں نے عرض کی: یہ میرے لیے کیسے ممکن ہے؟ آپ صلی اللہ علیہ وسلم نے فرمایا: ”اس چیز کو چھوڑ دو جو تمہیں شک میں ڈالے اور اسے اختیار کرو جو تمہیں شک میں نہ ڈالے، اگرچہ تمہیں فتویٰ دینے والے فتویٰ دیتے رہیں“۔ میں نے عرض کی: مجھے اس کا علم کیسے ہوگا؟ آپ صلی اللہ علیہ وسلم نے فرمایا: ”اپنا ہاتھ اپنے دل پر رکھو، کیونکہ دل حلال سے سکون پاتا ہے اور حرام سے اسے سکون نہیں ملتا، اور یقیناً پرہیزگار مسلمان چھوٹے گناہ کو اس خوف سے چھوڑ دیتا ہے کہ کہیں وہ بڑے گناہ میں نہ مبتلا ہو جائے“۔ میں نے عرض کی: میرے ماں باپ آپ پر قربان ہوں، عصبیت کیا ہے؟ آپ صلی اللہ علیہ وسلم نے فرمایا: ”جو شخص اپنی قوم کی ظلم پر مدد کرے“۔ میں نے عرض کی: پھر حریص کون ہے؟ آپ صلی اللہ علیہ وسلم نے فرمایا: ”وہ جو ناجائز ذرائع سے کمائی طلب کرے“۔ میں نے عرض کی: تو پھر پرہیزگار کون ہے؟ آپ صلی اللہ علیہ وسلم نے فرمایا: ”وہ جو شبہ والی چیز کے پاس (آنے پر) رک جائے“۔ میں نے عرض کی: تو پھر مومن کون ہے؟ آپ صلی اللہ علیہ وسلم نے فرمایا: ”جس سے لوگ اپنے مالوں اور اپنی جانوں کے متعلق پرامن رہیں“۔ میں نے عرض کی: تو پھر مسلمان کون ہے؟ آپ صلی اللہ علیہ وسلم نے فرمایا: ”جس کی زبان اور ہاتھ سے (دوسرے) مسلمان محفوظ رہیں“۔ میں نے عرض کی: تو کون سا جہاد سب سے افضل ہے؟ آپ صلی اللہ علیہ وسلم نے فرمایا: ”ظالم حکمران کے سامنے عدل و انصاف کی بات کہنا“۔ [مسند أبي يعلى الموصلي/حديث واثلة بن الأسقع/حدیث: 7492]