سیدنا عبداللہ بن سلام رضی اللہ عنہ سے روایت ہے، انہوں نے فرمایا کہ ”ہم اللہ عزوجل کے نزدیک سب سے زیادہ پسندیدہ اعمال کا تذکرہ کر رہے تھے، تو ہم نے (آپس میں) کہا کہ کون ہے جو ہماری طرف سے رسول اللہ صلی اللہ علیہ وسلم سے (اس بارے میں) دریافت کرے؟ تاہم آپ صلی اللہ علیہ وسلم کی ہیبت و جلال کے پیشِ نظر ہم سوال کرنے سے ڈرتے رہے، پھر آپ صلی اللہ علیہ وسلم نے ہمیں ایک ایک کر کے طلب فرمایا یہاں تک کہ ہم سب آپ صلی اللہ علیہ وسلم کی خدمت میں اکٹھے ہو گئے، ہم میں سے بعض بعض کے پاس گئے لیکن ہمیں (صورتحال کا) پتا نہ تھا، پھر آپ صلی اللہ علیہ وسلم نے ہماری طرف (بلاوا) بھیجا اور رسول اللہ صلی اللہ علیہ وسلم نے ہمیں یہ سورت پڑھ کر سنائی: ﴿سَبَّحَ لِلَّهِ مَا فِي السَّمَوَاتِ وَمَا فِي الْأَرْضِ﴾ سے لے کر اللہ تعالیٰ کے اس ارشاد ﴿بُنْيَانٌ مَرْصُوصٌ﴾ تک۔“ سیدنا عبداللہ بن سلام رضی اللہ عنہ فرماتے ہیں کہ ”پھر رسول اللہ صلی اللہ علیہ وسلم نے ہمیں یہ پوری سورت شروع سے آخر تک پڑھ کر سنائی۔“ ابو سلمہ بن عبد الرحمن رحمہ اللہ بیان کرتے ہیں کہ ”اور ہمیں سیدنا عبداللہ بن سلام رضی اللہ عنہ نے یہ مکمل سورت اول سے آخر تک پڑھ کر سنائی۔“ [مسند أبي يعلى الموصلي/حديث عبد الله بن سلام/حدیث: 7499]