سیدنا سہل بن سعد رضی اللہ عنہ سے روایت ہے کہ ایک خاتون رسول اللہ صلی اللہ علیہ وسلم کی خدمت میں حاضر ہوئیں اور عرض کیا: ”اے اللہ کے رسول! میں خود کو آپ کے لیے ہبہ کرنے (نکاح کی پیشکش کے لیے) آئی ہوں۔“ رسول اللہ صلی اللہ علیہ وسلم نے ان کی طرف دیکھا، پھر اپنی نگاہ ان پر اوپر سے نیچے تک ڈالی، جب وہ کافی دیر تک کھڑی رہیں اور آپ صلی اللہ علیہ وسلم نے کوئی فیصلہ نہ فرمایا تو وہ ایک طرف ہو کر بیٹھ گئیں۔ تب رسول اللہ صلی اللہ علیہ وسلم کے صحابہ میں سے ایک صاحب کھڑے ہوئے اور عرض کیا: ”اے اللہ کے رسول! اگر آپ کو ان کی ضرورت نہیں تو ان کا نکاح مجھ سے فرما دیں۔“ آپ صلی اللہ علیہ وسلم نے دریافت فرمایا: ”کیا تمہارے پاس (مہر کے طور پر دینے کے لیے) کوئی چیز ہے؟“ انہوں نے عرض کیا: ”اے اللہ کے رسول! اللہ کی قسم، میرے پاس کچھ نہیں ہے۔“ آپ صلی اللہ علیہ وسلم نے فرمایا: ”جاؤ (گھر جا کر) تلاش کرو۔“ وہ گئے اور واپس آ کر عرض کیا: ”مجھے کچھ نہیں ملا۔“ آپ صلی اللہ علیہ وسلم نے فرمایا: ”جاؤ اور دیکھو خواہ لوہے کی ایک انگوٹھی ہی کیوں نہ ہو۔“ وہ پھر گئے اور واپس آ کر عرض کیا: ”اے اللہ کے رسول! لوہے کی انگوٹھی بھی نہیں ملی، البتہ یہ میرا تہبند موجود ہے“ جبکہ ان کے پاس چادر تک نہ تھی، انہوں نے کہا کہ ”میں یہی ان کو مہر میں دے دوں گا۔“ رسول اللہ صلی اللہ علیہ وسلم نے فرمایا: ”تمہارے تہبند کا کیا فائدہ؟ اگر وہ اسے پہنے گی تو تمہارے پاس پہننے کو کچھ نہ رہے گا اور اگر تم اسے پہنو گے تو اس کے پاس کچھ نہیں رہے گا۔“ جب وہ صاحب کافی دیر بیٹھنے کے بعد اٹھ کر جانے لگے تو رسول اللہ صلی اللہ علیہ وسلم نے انہیں پیٹھ پھیر کر جاتے ہوئے دیکھا اور انہیں بلانے کا حکم دیا، جب وہ آئے تو آپ صلی اللہ علیہ وسلم نے دریافت فرمایا: ”تمہیں قرآن کتنا یاد ہے؟“ انہوں نے عرض کیا: ”مجھے فلاں فلاں سورتیں یاد ہیں“ اور انہوں نے ان سورتوں کو شمار کیا۔ تب آپ صلی اللہ علیہ وسلم نے ارشاد فرمایا: ”جاؤ، میں نے قرآن کی ان سورتوں کے عوض جو تمہیں یاد ہیں، اس عورت کو تمہاری ملکیت میں دے دیا (یعنی تمہارا نکاح کر دیا)۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7539]