محمد بن عبد اللہ بن نوفل رحمہ اللہ سے روایت ہے کہ جس سال سیدنا معاویہ رضی اللہ عنہ نے حج کیا، انہوں نے سیدنا سعد بن مالک اور سیدنا ضحاک بن قیس رضی اللہ عنہما کو حج تمتع (یعنی حج کے ساتھ عمرہ ملا کر فائدہ اٹھانے) کا ذکر کرتے سنا۔ سیدنا ضحاک رضی اللہ عنہ نے کہا: ”ایسا وہی کرتا ہے جو اللہ کے حکم سے ناواقف ہو۔“ سیدنا سعد رضی اللہ عنہ نے فرمایا: ”بھتیجے! تم نے بہت بری بات کہی۔“ سیدنا ضحاک رضی اللہ عنہ نے کہا: ”سیدنا عمر رضی اللہ عنہ نے اس سے منع فرمایا تھا۔“ سیدنا سعد رضی اللہ عنہ نے فرمایا: ”رسول اللہ صلی اللہ علیہ وسلم نے یہ عمل کیا ہے اور ہم نے بھی آپ صلی اللہ علیہ وسلم کے ساتھ کیا ہے۔“ [مسند أبي يعلى الموصلي/مسند سعد بن أبي وقاص/حدیث: 805]