امام عامر شعبی رحمہ اللہ بیان کرتے ہیں کہ جب مروان نے ضحاک بن قیس سے جنگ کی تو اس نے ایمن بن خریم اسدی کو پیغام بھیجا: ”ہم چاہتے ہیں کہ تم ہمارے ساتھ مل کر لڑو۔“ انہوں نے کہا: ”میرے والد اور میرے چچا دونوں غزوۂ بدر میں شریک ہوئے تھے، انہوں نے مجھ سے عہد لیا تھا کہ میں کسی ایسے شخص سے نہ لڑوں جو یہ گواہی دیتا ہو کہ اللہ کے سوا کوئی معبود نہیں۔ اگر تم میرے پاس جہنم سے براءت (کا پروانہ) لے آؤ تو میں تمہارے ساتھ لڑوں گا۔“ مروان نے کہا: ”چلے جاؤ“ اور ان کی برائی کی اور انہیں برا بھلا کہا۔ تو ایمن نے یہ اشعار کہے: ”میں قریش کے کسی دوسرے حکمران کی خاطر کسی نمازی شخص سے لڑنے والا نہیں۔ اس (حکمران) کو اس کی حکومت ملے اور گناہ میرے سر آئے؟ میں اللہ کی پناہ مانگتا ہوں ایسی جہالت اور نادانی سے۔ کیا میں بلاوجہ کسی مسلمان سے لڑوں؟ پھر تو جب تک میں جیتا رہوں میری زندگی مجھے کوئی فائدہ نہ دے گی۔“ [مسند أبي يعلى الموصلي/أيمن بن خريم الأسدي/حدیث: 947]