حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”کیا میں تمہیں نہ بتاؤں کہ لوگوں میں سے بہترین رتبے والا کون شخص ہے؟“ ہم نے عرض کیا: کیوں نہیں، اے اللہ کے رسول! (ضرور بتائیں!) آپ صلی اللہ علیہ وسلم نے فرمایا: ”وہ آدمی جو اللہ تعالیٰ کے راستے میں اپنا گھوڑا لیے پھرتا ہے یہاں تک کہ اسے موت آجاتی ہے یا وہ شہید ہو جاتا ہے، اور کیا میں تمہیں وہ شخص بتاؤں جو رتبے میں اس کے قریب ہے؟“ ہم نے عرض کیا: جی ہاں، اے اللہ کے رسول! آپ صلی اللہ علیہ وسلم نے فرمایا: ”وہ شخص جو کسی پہاڑ کی گھاٹی میں علیحدہ رہتا ہے، نماز قائم کرتا ہے، زکاۃ ادا کرتا ہے اور لوگوں کے شر سے دور رہتا ہے، اور کیا میں تمہیں بتاؤں کہ بدترین شخص کون ہے؟“ ہم نے عرض کیا: جی ہاں، اے اللہ کے رسول! آپ صلی اللہ علیہ وسلم نے فرمایا: ”وہ شخص جو اللہ کے نام پر (لوگوں سے) مانگے، لیکن اللہ کے نام پر (کسی کو) نہ دے۔“ [سنن نسائي/كتاب الزكاة/حدیث: 2570]