حضرت ابن عباس رضی اللہ عنہما سے روایت ہے کہ حضرت سعد بن عبادہ رضی اللہ عنہ نے نبی اکرم صلی اللہ علیہ وسلم سے اس نذر کے بارے میں پوچھا جو ان کی والدہ کے ذمے تھی لیکن وہ اسے پورا کرنے سے پہلے فوت ہو گئی تھیں۔ آپ صلی اللہ علیہ وسلم نے فرمایا: ”اس کی طرف سے تم اسے پورا کر دو۔“ [سنن نسائي/كتاب الوصايا/حدیث: 3690]

حضرت سعد رضی اللہ عنہ سے روایت ہے کہ میری والدہ محترمہ فوت ہو گئیں، جبکہ ان کے ذمے ایک نذر تھی، میں نے نبی اکرم صلی اللہ علیہ وسلم سے پوچھا تو آپ نے مجھے وہ نذر ان کی طرف سے ادا کرنے کا حکم دیا۔ [سنن نسائي/كتاب الوصايا/حدیث: 3691]

حضرت ابن عباس رضی اللہ عنہما نے فرمایا کہ حضرت سعد بن عبادہ انصاری رضی اللہ عنہ نے رسول اللہ صلی اللہ علیہ وسلم سے اس نذر کے بارے میں پوچھا جو ان کی والدہ محترمہ کے ذمے تھی، لیکن وہ اس کی ادائیگی سے پہلے ہی فوت ہو گئی تھیں، رسول اللہ صلی اللہ علیہ وسلم نے فرمایا: ”تم اس کی طرف سے ادا کر دو۔“ [سنن نسائي/كتاب الوصايا/حدیث: 3692]

حضرت عبداللہ بن عباس رضی اللہ عنہما سے روایت ہے، انہوں نے فرمایا کہ حضرت سعد بن عبادہ رضی اللہ عنہ نبی صلی اللہ علیہ وسلم کے پاس حاضر ہوئے اور عرض کیا: میری والدہ محترمہ فوت ہوگئی ہیں، ان کے ذمے ایک نذر تھی جسے وہ پورا نہ کرسکیں۔ آپ صلی اللہ علیہ وسلم نے فرمایا: ”اس کی طرف سے تم پوری کردو۔“ [سنن نسائي/كتاب الوصايا/حدیث: 3693]

حضرت سعد بن عبادہ رضی اللہ عنہ سے روایت ہے کہ میں نے عرض کیا: اے اللہ کے رسول صلی اللہ علیہ وسلم ! میری والدہ محترمہ فوت ہو گئی ہیں۔ کیا میں ان کی طرف سے صدقہ کر سکتا ہوں؟ آپ صلی اللہ علیہ وسلم نے فرمایا: ”ہاں۔“ میں نے عرض کیا: کون سا صدقہ زیادہ فضیلت رکھتا ہے؟ آپ صلی اللہ علیہ وسلم نے فرمایا: ”پانی پلانا۔“ [سنن نسائي/كتاب الوصايا/حدیث: 3694]

حضرت سعد بن عبادہ رضی اللہ عنہ سے روایت ہے، انہوں نے فرمایا کہ میں نے عرض کیا: اے اللہ کے رسول صلی اللہ علیہ وسلم ! کون سا صدقہ افضل ہے؟ آپ صلی اللہ علیہ وسلم نے فرمایا: ”پانی پلانا۔“ [سنن نسائي/كتاب الوصايا/حدیث: 3695]

حضرت سعد بن عبادہ رضی اللہ عنہ سے مروی ہے کہ ان کی والدہ فوت ہو گئیں تو انہوں نے رسول اللہ صلی اللہ علیہ وسلم سے کہا: میری والدہ فوت ہو گئی ہیں تو کیا میں ان کی طرف سے صدقہ کر دوں؟ آپ صلی اللہ علیہ وسلم نے فرمایا: ”ہاں۔“ انہوں نے کہا: افضل صدقہ کون سا ہے؟ آپ صلی اللہ علیہ وسلم نے فرمایا: ”پانی پلانا۔“ اسی بنا پر حضرت سعد رضی اللہ عنہ نے مدینہ میں سبیل قائم کر دی تھی (تاکہ مسافر وغیرہ کسی تنگی کے بغیر ہر وقت پانی پی سکیں)۔ [سنن نسائي/كتاب الوصايا/حدیث: 3696]