حضرت عمرو بن شعیب کے پردادا (حضرت عبداللہ بن عمرو رضی اللہ عنہما) بیان کرتے ہیں کہ رسول اللہ صلی اللہ علیہ وسلم سے عقیقے کے بارے میں پوچھا گیا تو آپ صلی اللہ علیہ وسلم نے فرمایا: ”اللہ تعالیٰ «عُقُوق» کو ناپسند فرماتا ہے۔“ (معلوم ہوتا ہے رسول اللہ صلی اللہ علیہ وسلم نے لفظ عقیقہ کو اچھا نہیں سمجھا)۔ اس سائل نے رسول اللہ صلی اللہ علیہ وسلم سے کہا: جب ہم میں سے کسی کے ہاں بچہ پیدا ہو تو وہ جانور ذبح کرتا ہے۔ (ہم تو اس کے متعلق پوچھ رہے ہیں) آپ صلی اللہ علیہ وسلم نے فرمایا: ”جو شخص اپنے بچے کی طرف سے جانور ذبح کرنا چاہے تو وہ لڑکے کی طرف سے دو پوری بکریاں ذبح کرے اور لڑکی کی طرف سے ایک بکری۔“ (راویٔ حدیث) داؤد نے کہا کہ میں نے زید بن اسلم رحمہ اللہ سے «الْمُكَافَأَتَانِ» کی بابت پوچھا تو انہوں نے کہا: اس سے مراد دو ایک جیسی بکریاں ہیں جو بیک وقت ذبح کی جائیں۔ [سنن نسائي/كتاب العقيقة/حدیث: 4217]

حضرت بریدہ رضی اللہ عنہ سے روایت ہے کہ رسول اللہ صلی اللہ علیہ وسلم نے حضرت حسن اور حسین رضی اللہ عنہما کی طرف سے عقیقہ کیا۔ [سنن نسائي/كتاب العقيقة/حدیث: 4218]