حضرت عائشہ رضی اللہ عنہا سے روایت ہے، انہوں نے بتایا کہ حضرت بریرہ رضی اللہ عنہا ان کے پاس آئیں اور وہ ان سے اپنی کتابت کی رقم کے سلسلے میں مدد لینا چاہتی تھیں، جبکہ انہوں نے کتابت کی رقم سے ابھی کچھ بھی ادا نہیں کیا تھا۔ حضرت عائشہ رضی اللہ عنہا نے ان سے فرمایا: تم اپنے آقاؤں کے پاس جاؤ اگر وہ پسند کریں تو میں تیری کتابت کی رقم یکمشت ادا کر دوں بشرطیکہ تیری ولا میرے لیے ہو گی، میں ایسا کرنے کو تیار ہوں۔ حضرت بریرہ رضی اللہ عنہا نے اپنے مالکان سے اس کا ذکر کیا تو انہوں نے اس سے انکار کر دیا اور کہا: اگر حضرت عائشہ رضی اللہ عنہا ثواب لینے کے لیے ایسا کرنا چاہیں تو کر لیں لیکن ولا ہمارے لیے رہے گی۔ حضرت عائشہ رضی اللہ عنہا نے جب اس کا تذکرہ رسول اللہ صلی اللہ علیہ وسلم سے کیا تو آپ نے ان سے فرمایا: ”تم بریرہ رضی اللہ عنہا کو خرید کر آزاد کرو، ولا تو اسی کا حق ہے جس نے آزاد کیا ہے۔“ [صحيح البخاري/كِتَاب الشُّرُوطِ/حدیث: 2717]