حضرت جابر بن عبداللہ رضی اللہ عنہ سے روایت ہے کہ نبی صلی اللہ علیہ وسلم نے اپنے صحابہ کرام رضی اللہ عنہم کو ساتویں غزوے، یعنی غزوہ ذات الرقاع میں صلاۃِ خوف پڑھائی تھی۔ حضرت ابن عباس رضی اللہ عنہما نے فرمایا: ”نبی صلی اللہ علیہ وسلم نے صلاۃِ خوف مقام ذی قرد میں پڑھی تھی۔“ [صحيح البخاري/كِتَاب الْمَغَازِي/حدیث: 4125]

حضرت جابر رضی اللہ عنہ ہی سے روایت ہے، انہوں نے فرمایا: ”نبی صلی اللہ علیہ وسلم نے اپنے اصحاب کو غزوہ محارب اور بنو ثعلبہ میں «صَلَاةَ الْخَوْفِ» ”صلاۃِ خوف“ پڑھائی تھی۔“ [صحيح البخاري/كِتَاب الْمَغَازِي/حدیث: 4126]

حضرت جابر رضی اللہ عنہ سے ایک اور روایت ہے کہ نبی صلی اللہ علیہ وسلم غزوہ ذات الرقاع کے لیے مقام نخل سے روانہ ہوئے تھے۔ وہاں آپ کا قبیلہ غطفان کی ایک جماعت سے سامنا ہوا لیکن باقاعدہ جنگ نہیں ہوئی تھی۔ البتہ مسلمانوں پر کفار کے اچانک حملے کا خطرہ تھا، اس لیے نبی صلی اللہ علیہ وسلم نے دو رکعت صلاۃِ خوف پڑھائی۔ حضرت سلمہ بن اکوع رضی اللہ عنہ کا بیان ہے کہ ”میں نبی صلی اللہ علیہ وسلم کے ہمراہ غزوہ ذات قرد میں شریک تھا۔“ [صحيح البخاري/كِتَاب الْمَغَازِي/حدیث: 4127]

حضرت ابوموسیٰ اشعری رضی اللہ عنہ سے روایت ہے، انہوں نے کہا: ”ہم ایک غزوے میں نبی صلی اللہ علیہ وسلم کے ہمراہ روانہ ہوئے جبکہ ہم چھ آدمی تھے۔ ہمارے پاس ایک ہی اونٹ تھا جس پر باری باری سواری کرتے تھے۔ اس سفر میں ہمارے پاؤں زخمی ہو گئے۔ میرے قدم بھی زخمی ہوئے حتی کہ میرے (پاؤں کے) ناخن گر گئے تو ہم نے اپنے پاؤں پر چیتھڑے لپیٹ لیے، اس لیے اس غزوے کا نام «ذَاتُ الرِّقَاعِ» رکھا گیا کیونکہ ہم نے اپنے پاؤں پر پٹیاں باندھی تھیں۔“ حضرت ابوموسیٰ اشعری رضی اللہ عنہ نے یہ حدیث بیان کی لیکن پھر وہ اسے پسند نہیں کرتے تھے اور فرماتے تھے: ”یہ نیکی میں نے اس لیے نہیں کی تھی کہ اس کا شہرہ کروں۔“ گویا انہوں نے اپنے اس عمل کو ظاہر کرنا پسند نہیں کیا۔ [صحيح البخاري/كِتَاب الْمَغَازِي/حدیث: 4128]

حضرت صالح بن خوات رضی اللہ عنہ سے روایت ہے، وہ اس صحابی سے بیان کرتے ہیں جنہوں نے رسول اللہ صلی اللہ علیہ وسلم کے ہمراہ صلاۃ خوف پڑھی تھی کہ ”ایک گروہ نے آپ صلی اللہ علیہ وسلم کے ہمراہ صف بندی کی جبکہ دوسرا گروہ دشمن کے سامنے کھڑا ہو گیا۔ جو گروہ آپ کے ہمراہ تھا، آپ نے اسے ایک رکعت پڑھائی۔ پھر آپ کھڑے رہے کہ ان لوگوں نے اپنی نماز مکمل کر لی۔ پھر وہ چلے گئے اور دشمن کے سامنے صف بندی کی۔ پھر دوسرا گروہ آیا تو آپ نے ان کو باقی ماندہ دوسری رکعت پڑھائی۔ پھر آپ بیٹھے رہے حتی کہ لوگوں نے اپنی اپنی نماز پوری کر لی۔ پھر آپ نے ان کے ساتھ سلام پھیرا۔“ [صحيح البخاري/كِتَاب الْمَغَازِي/حدیث: 4129]

حضرت جابر رضی اللہ عنہ سے روایت ہے، انہوں نے کہا کہ ”ہم نبی صلی اللہ علیہ وسلم کے ہمراہ مقام نخل میں تھے۔“ پھر انہوں نے صلاۃ خوف کا ذکر کیا۔ امام مالک رحمہ اللہ بیان کرتے ہیں کہ ”نماز خوف کے متعلق میں نے جتنی بھی روایات سنی ہیں، یہ روایت ان سب سے بہتر ہے۔“ دوسری سند سے مروی ایک روایت میں ہے کہ ”نبی صلی اللہ علیہ وسلم نے غزوہ بنو انمار میں صلاۃ خوف پڑھی تھی۔“ [صحيح البخاري/كِتَاب الْمَغَازِي/حدیث: 4130]

حضرت صالح بن خوات رضی اللہ عنہ سے روایت ہے، وہ حضرت سہل بن ابی حثمہ رضی اللہ عنہ سے بیان کرتے ہیں، انہوں نے فرمایا کہ: ”صلاۃِ خوف میں امام قبلہ رو ہو کر کھڑا ہو گا اور مجاہدین کا ایک گروہ امام کے ساتھ کھڑا ہو۔ اس دوران میں مجاہدین کا دوسرا گروہ دشمن کے سامنے صف آراء رہے، ان کے منہ دشمن کی طرف ہوں۔ امام اپنے ساتھ والے گروہ کو پہلے ایک رکعت پڑھائے، پھر وہ کھڑے ہو کر اپنا اپنا رکوع اور دو دو سجدے اسی جگہ کر لیں۔ پھر یہ گروہ دوسرے گروہ کی جگہ چلا جائے اور امام ان کو بھی ایک رکعت پڑھائے، اس طرح امام کی دو رکعتیں پوری ہو جائیں گی اور یہ دوسرا گروہ ایک رکوع اور دو سجدے خود ادا کرے گا۔“ (راویِ حدیث) مسدد اپنے استاد یحییٰ سے، وہ شعبہ سے اور وہ عبدالرحمٰن بن قاسم سے بواسطہ قاسم، انہوں نے حضرت صالح بن خوات سے روایت کیا اور وہ سہل بن ابی حثمہ رضی اللہ عنہ سے بیان کرتے ہیں، انہوں نے یہ کیفیت آپ صلی اللہ علیہ وسلم سے بیان کی ہے۔ محمد بن عبیداللہ نے اپنی سند سے اس حدیث کو روایت کیا ہے۔ [صحيح البخاري/كِتَاب الْمَغَازِي/حدیث: 4131]