حضرت خباب بن ارت رضی اللہ عنہ سے روایت ہے، انہوں نے کہا: ”میں عاص بن وائل سہمی کے پاس اپنا حق لینے کے لیے گیا جو اس کے ذمے تھا تو اس نے کہا: ”جب تک تم محمد صلی اللہ علیہ وسلم سے کفر نہیں کرو گے میں تجھے تیرا حق نہیں دوں گا۔“ میں نے کہا: ”تو مر کر دوبارہ زندہ ہو جائے تب بھی یہ نہیں ہو سکتا۔“ اس نے کہا: ”کیا مرنے کے بعد مجھے دوبارہ زندہ کیا جائے گا؟“ میں نے کہا: ”ہاں ضرور۔“ اس نے کہا: ”میرے لیے وہاں مال و اولاد ہو گی اور میں تمہارا حق بھی وہیں ادا کر دوں گا۔“ اس پر یہ آیت نازل ہوئی: ﴿أَفَرَأَيْتَ الَّذِي كَفَرَ بِآيَاتِنَا وَقَالَ لَأُوتَيَنَّ مَالًا وَوَلَدًا﴾ [سورة مريم: 77] ”کیا آپ نے اس شخص کو دیکھا جو ہماری آیت کا انکار کرتے ہوئے کہتا ہے کہ مجھے مال و اولاد مل کر رہے گا۔“ اس حدیث کو سفیان ثوری، شعبہ، حفص، ابو معاویہ اور وکیع نے بھی حضرت اعمش سے بیان کیا ہے۔ [صحيح البخاري/كِتَاب تَفْسِيرِ الْقُرْآنِ/حدیث: 4732]