عائشہ رضی اللہ عنہا بیان کرتی ہیں، میں نے رسول اللہ صلی ‌اللہ ‌علیہ ‌وآلہ ‌وسلم کو فرماتے ہوئے سنا: ”جس مال میں زکوۃ خلط ملط ہو جائے تو وہ (زکوۃ) اس کو ختم کر دیتی ہے“، اسے امام شافعی رحمہ اللہ اور امام بخاری رحمہ اللہ نے اپنی ’تاریخ‘ میں روایت کیا ہے، اور امام حمیدی رحمہ اللہ نے یہ اضافہ نقل کیا ہے: ”اگر تم پر زکوۃ واجب ہو اور پھر تم اسے ادا نہ کرو تو اس طرح حرام، حلال کو تباہ کر دے گا“، اس سے ان لوگوں نے دلیل لی ہے جو سمجھتے ہیں کہ زکوۃ عین مال سے ادا کرنا فرض ہے۔ ’منتقیٰ‘ میں بھی اسی طرح ہے۔ امام بیہقی رحمہ اللہ نے امام احمد بن حنبل رحمہ اللہ سے اپنی سند کے ساتھ عائشہ رضی اللہ عنہا سے ’شعب الایمان‘ میں بیان کیا ہے اور امام احمد رحمہ اللہ نے ”زکوۃ کا مال ملانے“ کی تفسیر بیان کرتے ہوئے کہا: ”اس سے مراد یہ ہے کہ کوئی مال دار شخص زکوۃ وصول کرے جبکہ یہ فقراء کا حق ہے“۔ [ضعیف] [مشكوة المصابيح/كتاب الزكاة/حدیث: 1793]