حضرت عطاء بن ابی رباح رحمہ اللہ سے روایت ہے، انہوں نے کہا کہ مجھے حضرت ابن عباس رضی اللہ عنہما نے فرمایا: ”کیا میں تجھے ایک جنتی عورت نہ دکھاؤں؟“ میں نے کہا: ”ضرور دکھائیں۔“ انہوں نے کہا: ”اس سیاہ فام عورت نے نبی صلی اللہ علیہ وسلم کی خدمت میں حاضر ہو کر عرض کی: ”اے اللہ کے رسول! مجھے مرگی کا دورہ پڑتا ہے، اس وجہ سے میرا ستر کھل جاتا ہے، آپ میرے لیے اللہ تعالیٰ سے دعا فرمائیں۔“ آپ صلی اللہ علیہ وسلم نے فرمایا: ”اگر تو چاہے تو صبر کر، اس کے عوض تجھے جنت ملے گی اور اگر تو چاہتی ہے تو میں اللہ تعالیٰ سے دعا کر دیتا ہوں کہ تجھے تندرستی دے۔“ اس نے کہا: ”میں صبر کروں گی۔“ پھر اس نے عرض کی کہ مرگی کے دورے کے دوران میرا ستر کھل جاتا ہے، آپ میرے لیے اللہ سے دعا کریں کہ میرا ستر نہ کھلا کرے، تو آپ صلی اللہ علیہ وسلم نے اس کے لیے دعا فرمائی۔“ [صحيح البخاري/كتاب المرضى/حدیث: 5652]