حضرت ابن عباس رضی اللہ عنہما اور حضرت عائشہ رضی اللہ عنہا سے روایت ہے کہ ”حضرت ابوبکر صدیق رضی اللہ عنہ نے نبی صلی اللہ علیہ وسلم کو بوسہ دیا جبکہ آپ فوت ہو چکے تھے۔“ [صحيح البخاري/كِتَاب الطِّبِّ/حدیث: 5709]

حضرت ابن عباس رضی اللہ عنہما اور حضرت عائشہ رضی اللہ عنہا سے روایت ہے کہ ”حضرت ابوبکر صدیق رضی اللہ عنہ نے نبی صلی اللہ علیہ وسلم کو بوسہ دیا جبکہ آپ صلی اللہ علیہ وسلم فوت ہو چکے تھے۔“ [صحيح البخاري/كِتَاب الطِّبِّ/حدیث: 5710]

حضرت ابن عباس اور حضرت عائشہ رضی اللہ عنہما سے روایت ہے کہ ”حضرت ابوبکر صدیق رضی اللہ عنہ نے نبی صلی اللہ علیہ وسلم کو بوسہ دیا جبکہ آپ صلی اللہ علیہ وسلم فوت ہو چکے تھے۔“ [صحيح البخاري/كِتَاب الطِّبِّ/حدیث: 5711]

حضرت عائشہ رضی اللہ عنہا فرماتی ہیں کہ ”ہم نے آپ صلی اللہ علیہ وسلم کی بیماری کے وقت آپ کے منہ میں دوا ڈالی تو آپ نے ہمیں اشارہ فرمایا کہ ”میرے منہ میں دوا نہ ڈالو۔“ ہم نے خیال کیا کہ مریض کو دوا سے نفرت ہوتی ہے، اس وجہ سے آپ ہمیں منع فرما رہے ہیں۔ پھر جب آپ کو افاقہ ہوا تو آپ نے فرمایا: ”کیا میں نے تمہیں منع نہیں کیا تھا کہ میرے منہ میں دوائی نہ ڈالو؟“ ہم نے کہا کہ (ہمارا خیال تھا) شاید آپ نے مریض کی دوا سے طبعی نفرت کی وجہ سے ایسا کیا ہوگا۔ آپ صلی اللہ علیہ وسلم نے فرمایا: ”اب گھر میں جتنے لوگ اس وقت موجود ہیں، سب کے منہ میں دوا ڈالی جائے اور میں اس منظر کو دیکھتا ہوں، لیکن عباس رضی اللہ عنہ کو چھوڑ دیا جائے کیونکہ وہ تمہارے اس کام میں شریک نہیں تھے۔““ [صحيح البخاري/كِتَاب الطِّبِّ/حدیث: 5712]

حضرت ام قیس رضی اللہ عنہا سے روایت ہے، انہوں نے کہا کہ میں اپنے ایک بیٹے کو لے کر رسول اللہ صلی اللہ علیہ وسلم کی خدمت میں حاضر ہوئی جبکہ میں نے عذرہ (گلے کی بیماری) کی وجہ سے اس کا تالو دبوایا تھا۔ آپ صلی اللہ علیہ وسلم نے فرمایا: ”تم اپنے بچوں کو انگلی سے حلق دبا کر کیوں تکلیف دیتی ہو؟ تم عود ہندی استعمال کرو۔ اس میں سات بیماریوں کی شفا ہے، ان میں سے ایک سینے کا درد ہے۔ اگر حلق کی بیماری ہے تو ناک میں دوائی ڈالی جائے اور سینے کے درد کے لیے منہ کے ایک جانب دوائی ڈالی جائے۔“ (سفیان کہتے ہیں کہ) میں نے زہری سے سنا کہ آپ صلی اللہ علیہ وسلم نے دو بیماریوں کو بیان کیا لیکن باقی پانچ بیماریوں کا ذکر نہیں کیا۔ (عبداللہ بن مدینی نے کہا کہ) میں نے سفیان سے ذکر کیا کہ معمر تو «أَعْلَقْتُ عَلَيْهِ» ”أعلقت علیہ“ کے الفاظ بیان کرتا ہے؟ انہوں نے کہا: معمر نے یاد نہیں رکھا، مجھے یاد ہے کہ زہری نے «أَعْلَقْتُ عَنْهُ» ”أعلقت عنہ“ کہا۔ سفیان نے اس تحنیک کو بیان کیا جو بچے کو پیدائش کے وقت کی جاتی ہے۔ سفیان نے اپنے حلق میں انگلی ڈالی اور اپنے تالو کو انگلی سے اٹھایا۔ سفیان نے اعلاق کے یہ معنیٰ بیان کیے کہ بچے کو حلق میں انگلی ڈال کر اس کا تالو اٹھانا، انہوں نے «أَعْلَقُوا عَنْهُ شَيْئًا» ”أعلقوا عنہ شیئا“ کے الفاظ نہیں کہے۔ [صحيح البخاري/كِتَاب الطِّبِّ/حدیث: 5713]