ام المومنین حضرت عائشہ رضی اللہ عنہا سے روایت ہے انہوں نے کہا کہ چند مسلمانوں نے حبشہ کی طرف ہجرت کی اور حضرت ابو بکر صدیق رضی اللہ عنہ بھی ہجرت کی تیاری کرنے لگے تو نبی صلی اللہ علیہ وسلم نے فرمایا: ”ابھی ٹھہر جاؤ، مجھے امید ہے کہ ہجرت کی اجازت مجھے بھی دی جائے گی۔“ حضرت ابو بکر صدیق رضی اللہ عنہ نے عرض کی: میرے ماں باپ آپ پر قربان ہوں! کیا آپ کو بھی ہجرت کی امید ہے؟ آپ صلی اللہ علیہ وسلم نے فرمایا: ”ہاں۔“ چنانچہ حضرت ابو بکر صدیق رضی اللہ عنہ نے نبی صلی اللہ علیہ وسلم کی رفاقت کے لیے خود کو روک لیا اور اپنی دو اونٹنیوں کو چار ماہ تک کیکر کے پتے کھلاتے رہے۔ حضرت عائشہ رضی اللہ عنہا نے فرمایا: ہم ایک دن دوپہر کے وقت اپنے گھر میں بیٹھے ہوئے تھے کہ کسی نے حضرت ابو بکر صدیق رضی اللہ عنہ سے کہا: یہ رسول اللہ صلی اللہ علیہ وسلم جو سر، منہ ڈھانپے اس طرف تشریف لا رہے ہیں، عام طور پر آپ صلی اللہ علیہ وسلم اس وقت ہمارے گھر تشریف نہیں لاتے تھے، حضرت ابو بکر صدیق رضی اللہ عنہ نے کہا: میرے ماں باپ آپ پر قربان ہوں! اللہ کی قسم! آپ صلی اللہ علیہ وسلم کسی اہم کام کے لیے اس وقت تشریف لائے ہیں، بہرحال نبی صلی اللہ علیہ وسلم نے مکان پر پہنچ کر اجازت طلب کی۔ آپ صلی اللہ علیہ وسلم اندر تشریف لائے اور آتے ہی حضرت ابو بکر صدیق رضی اللہ عنہ سے فرمایا: ”جو لوگ اس وقت تمہارے پاس ہیں انہیں یہاں سے اٹھا دو۔“ حضرت ابو بکر صدیق رضی اللہ عنہ نے کہا: میرا باپ آپ پر قربان ہو، اے اللہ کے رسول! یہ سب آپ کے گھر کے افراد ہیں۔ آپ صلی اللہ علیہ وسلم نے فرمایا: ”مجھے ہجرت کی اجازت مل گئی ہے۔“ حضرت ابو بکر صدیق رضی اللہ عنہ نے عرض کی: میرے ماں باپ آپ پر قربان ہوں اے اللہ کے رسول! پھر مجھے رفاقت کی سعادت حاصل رہے گی؟ آپ صلی اللہ علیہ وسلم نے فرمایا: ”ہاں۔“ انہوں نے عرض کی: اللہ کے رسول! میرا باپ آپ پر قربان ہو، ان دو اونٹنیوں میں سے ایک آپ صلی اللہ علیہ وسلم لے لیں۔ نبی صلی اللہ علیہ وسلم نے فرمایا: ”میں یہ قیمت سے لیتا ہوں۔“ حضرت عائشہ رضی اللہ عنہا نے فرمایا: پھر ہم نے جلدی جلدی دونوں سواریوں کا سامان تیار کیا، پھر دونوں کے لیے کھانا تیار کر کے توشہ دان میں رکھ دیا۔ حضرت اسماء بنت ابی بکر رضی اللہ عنہا نے اپنے پٹکے کے ایک ٹکڑے سے اس توشہ دان کا منہ باندھ دیا۔ اس بنا پر انہیں «ذَاتُ النِّطَاقَيْنِ» ”ذات النطاقین“ کہا جاتا ہے۔ اس کے بعد نبی صلی اللہ علیہ وسلم اور حضرت ابو بکر صدیق رضی اللہ عنہ غارِ ثور میں جا کر چھپ گئے۔ وہاں تین راتیں قیام فرمایا۔ حضرت ابو بکر صدیق رضی اللہ عنہ کا بیٹا عبد اللہ رضی اللہ عنہ رات کے وقت ان کے پاس رہتا تھا۔ وہ نوجوان، ذہین اور سمجھدار تھا، وہ ان کے پاس سے سحری کے وقت روانہ ہوتا اور مکہ مکرمہ میں صبح ہوتے ہی قریش کے ہاں پہنچ جاتا جیسا کہ وہ مکہ ہی میں رات کے وقت رہا ہو۔ مکہ مکرمہ میں جو بات بھی ان حضرات کے خلاف ہوتی اسے محفوظ کر لیتا پھر جونہی رات کا اندھیرا چھا جاتا غارِ ثور میں ان حضرات کے پاس پہنچ کر تمام تفصیلات سے آگاہ کر دیتا۔ حضرت ابو بکر صدیق رضی اللہ عنہ کا آزاد کردہ غلام عامر بن فہیرہ رضی اللہ عنہ دودھ دینے والی بکریاں چراتا تھا اور جب رات کا ایک حصہ گزر جاتا تو ان بکریوں کو غارِ ثور کی طرف ہانک کر لے جاتا۔ وہ دونوں (رسول اللہ صلی اللہ علیہ وسلم اور حضرت ابو بکر صدیق رضی اللہ عنہ) بکریوں کا دودھ پی کر رات بسر کرتے، پھر عامر بن فہیرہ رضی اللہ عنہ صبح اندھیرے وہاں سے روانہ ہو جاتا۔ ان تین راتوں میں اس نے ہر رات ایسا ہی کیا۔ [صحيح البخاري/كِتَاب اللِّبَاسِ/حدیث: 5807]