حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے ایک دن میں سو مرتبہ درج ذیل کلمات: «لَا إِلَهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، وَهُوَ عَلَى كُلِّ شَيْءٍ قَدِيرٌ» ”اللہ کے سوا کوئی معبودِ برحق نہیں، وہ تنہا ہے، اس کا کوئی شریک نہیں، اسی کے لیے بادشاہت ہے اور تمام تعریفوں کا وہی سزاوار ہے اور وہ ہر چیز پر خوب قادر ہے“ پڑھے، اس کو دس غلام آزاد کرنے کا ثواب ملے گا اور اس کے لیے سو نیکیاں لکھ دی جائیں گی، نیز اس کے سو گناہ مٹا دیے جائیں گے۔ وہ سارا دن شیطان سے محفوظ رہے گا حتیٰ کہ شام ہو جائے، اور جو عمل اس نے کیا ہے اس سے افضل کسی کا عمل نہیں ہوگا مگر جو کوئی اس سے زیادہ عمل کرے۔“ [صحيح البخاري/كِتَاب الدَّعَوَاتِ/حدیث: 6403]

حضرت عمرو بن میمون رحمہ اللہ سے روایت ہے کہ جس نے دس مرتبہ یہ کلمہ کہا تو وہ ایسا ہوگا ”جیسے اس نے اولادِ اسماعیل علیہ السلام سے ایک غلام آزاد کیا“۔ (راویِ حدیث) حضرت عمر بن ابی زائدہ نے کہا: ”ہم سے عبداللہ بن ابو سفر نے بیان کیا، ان سے امام شعبی نے، ان سے ربیع بن خثیم نے یہی مضمون بیان کیا تو میں نے ربیع سے پوچھا کہ تم نے یہ حدیث کس سے سنی ہے؟ انہوں نے کہا: عمرو بن میمون سے۔ پھر میں عمرو بن میمون کے پاس آیا اور ان سے پوچھا کہ تم نے یہ حدیث کس سے سنی ہے؟ انہوں نے کہا: ابن ابی یعلیٰ سے۔ میں ابن ابی یعلیٰ کے پاس آیا اور ان سے پوچھا کہ تم نے یہ حدیث کس سے سنی ہے؟ انہوں نے کہا: حضرت ابو ایوب انصاری رضی اللہ عنہ سے اور وہ اسے نبی صلی اللہ علیہ وسلم سے بیان کرتے ہیں۔“ ابراہیم بن یوسف اپنے باپ سے بیان کرتے ہوئے کہتے ہیں وہ ابو اسحاق سے، انہوں نے کہا: ”مجھے عمرو بن میمون نے بیان کیا وہ عبدالرحمن بن ابی لیلیٰ سے، وہ حضرت ابو ایوب انصاری رضی اللہ عنہ سے انہوں نے نبی صلی اللہ علیہ وسلم سے یہی حدیث بیان کی۔“ موسیٰ بن اسماعیل نے کہا: ”ہم سے وہیب بن خالد نے بیان کیا داؤد بن ابی ہند سے، ان سے عامر شعبی نے، ان سے عبدالرحمن بن ابی لیلیٰ نے اور ان سے حضرت ابو ایوب انصاری رضی اللہ عنہ نے نبی صلی اللہ علیہ وسلم سے اس کو نقل کیا۔“ اسماعیل نے شعبی سے، انہوں نے ربیع بن خثیم سے موقوفاً ان کا قول نقل کیا ہے۔ آدم بن ابی ایاس نے کہا: ”ہم سے شعبہ نے بیان کیا، انہوں نے کہا: ہم سے عبدالملک بن میسرہ نے بیان کیا، انہوں نے کہا: میں نے ہلال بن یساف سے سنا، وہ ربیع بن خثیم اور عمرو بن میمون سے بیان کرتے ہیں، دونوں نے حضرت عبداللہ بن مسعود رضی اللہ عنہ سے ان کا قول بیان کیا ہے۔“ اعمش اور حصین نے ہلال سے، انہوں نے ربیع سے، انہوں نے حضرت عبداللہ بن مسعود رضی اللہ عنہ سے موقوفاً بیان کیا ہے۔ ابو محمد حضرمی نے حضرت ابو ایوب انصاری رضی اللہ عنہ سے، انہوں نے نبی صلی اللہ علیہ وسلم سے نقل کیا ہے: ”وہ ایسے ہے جیسے اس نے اسماعیل علیہ السلام کی اولاد سے ایک گردن آزاد کی۔“ ابوعبداللہ (امام بخاری رحمہ اللہ) کہتے ہیں: ”اور صحیح بات ہے کہ یہ عمرو کا قول ہے۔“ [صحيح البخاري/كِتَاب الدَّعَوَاتِ/حدیث: 6404]