سیدنا جبیر بن مطعم رضی اللہ عنہ سے روایت ہے کہ سنا انہوں نے رسول اللہ صلی اللہ علیہ وسلم سے، پڑھا سورۂ طور کو مغرب کی نماز میں۔

سیدہ اُم فضل رضی اللہ عنہا نے سیدنا عبداللہ بن عباس رضی اللہ عنہما کو سورہ «﴿‏وَالْمُرْسَلاَتِ عُرْفًا﴾» پڑھتے سنا تو کہا: اے بیٹے میرے! یاد دلا دیا تو نے سورۃ پڑھ کر، اخیر جو سنا میں نے رسول اللہ صلی اللہ علیہ وسلم سے اسی سورۃ کو پڑھا تھا آپ صلی اللہ علیہ وسلم نے مغرب میں۔

حضرت ابوعبداللہ صنابحی سے روایت ہے کہ میں مدینہ میں آیا جب سیدنا ابوبکر رضی اللہ عنہ خلیفہ تھے، تو پڑھی میں نے پیچھے اُن کے مغرب کی نماز تو پہلی دو رکعتوں میں سورۂ فاتحہ اور سورۂ مفصل کی چھوٹی سورتوں میں سے پڑھی، پھر جب تیسری رکعت کے واسطے کھڑے ہوئے تو میں نزدیک ہوگیا اُن کے۔ یہاں تک کہ میرے کپڑے قریب تھے کہ چھو جائیں ان کے کپڑوں سے، تو سنا میں نے پڑھی انہوں نے سورۂ فاتحہ اور یہ آیت «﴿‏رَبَّنَا لاَ تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِنْ لَدُنْكَ رَحْمَةً إِنَّكَ أَنْتَ الْوَهَّابُ‏﴾» ۔

حضرت نافع سے روایت ہے کہ سیدنا عبداللہ بن عمر رضی اللہ عنہما جب اکیلے نماز پڑھتے تھے تو چاروں رکعتوں میں سورۂ فاتحہ اور ایک ایک سورۃ پڑھتے تھے، اور کبھی دو دو اور تین سورتیں ایک ایک رکعت میں پڑھتے تھے فرض کی نماز میں، اور مغرب کی نماز میں دو رکعتوں میں فاتحہ اور سورت پڑھتے تھے۔

سیدنا براء بن عازب رضی اللہ عنہ سے روایت ہے کہ میں نے نماز پڑھی ساتھ رسول اللہ صلی اللہ علیہ وسلم کے عشاء کی، تو پڑھی آپ صلی اللہ علیہ وسلم نے اس میں «﴿وَالتِّينِ وَالزَّيْتُونِ﴾» ۔