حضرت ابوہریرہ رضی اللہ عنہ سے روایت ہے، انہوں نے کہا: ایک مرتبہ ہم مسجد میں تھے کہ اس دوران میں رسول اللہ صلی اللہ علیہ وسلم ہمارے پاس تشریف لائے اور فرمایا: ”یہودیوں کے پاس چلو۔“ ہم آپ صلی اللہ علیہ وسلم کے ساتھ روانہ ہوئے، جب ہم بیت المدراس پہنچے تو نبی صلی اللہ علیہ وسلم نے ان کو آواز دی: ”اے قومِ یہود! اسلام قبول کر لو تم سلامتی میں رہو گے۔“ انہوں نے کہا: ”اے ابوالقاسم! آپ نے پیغام پہنچا دیا۔“ رسول اللہ صلی اللہ علیہ وسلم نے فرمایا: ”میرا ارادہ بھی یہی تھا (کہ تم اس کا اعتراف کرو)۔“ پھر آپ صلی اللہ علیہ وسلم نے دوبارہ ان سے یہی فرمایا تو انہوں نے پھر کہا: ”اے ابوالقاسم! آپ نے تبلیغ کر دی۔“ رسول اللہ صلی اللہ علیہ وسلم نے تیسری مرتبہ بھی یہی فرمایا، پھر آپ صلی اللہ علیہ وسلم نے انہیں تنبیہ کی اور فرمایا: ”تمہیں معلوم ہونا چاہیے کہ زمین اللہ اور اس کے رسول کی ہے اور میں تمہیں (اس سرزمین سے) جلاوطن کرنا چاہتا ہوں، لہٰذا تم میں سے جس کے پاس مال ہو اسے چاہیے کہ جلاوطن ہونے سے پہلے پہلے اسے فروخت کر دے، بصورتِ دیگر تمہیں معلوم ہونا چاہیے کہ یہ زمین اللہ اور اس کے رسول کی ہے۔“ [صحيح البخاري/كِتَاب الْإِكْرَاهِ/حدیث: 6944]