حضرت زید بن ثابت رضی اللہ عنہ سے روایت ہے کہ نبی صلی اللہ علیہ وسلم نے انہیں حکم دیا کہ وہ یہودیوں کی تحریر سیکھیں، یہاں تک کہ میں ہی نبی صلی اللہ علیہ وسلم کے خطوط یہودیوں کے نام لکھتا تھا اور جب وہ آپ صلی اللہ علیہ وسلم کو خط لکھتے تو میں وہ خط پڑھ کر آپ صلی اللہ علیہ وسلم کو سناتا تھا۔ حضرت عمر رضی اللہ عنہ نے کہا جب کہ آپ کے پاس حضرت علی، حضرت عبدالرحمن بن حاطب اور حضرت عثمان رضی اللہ عنہم موجود تھے: ”یہ عورت کیا کہتی ہے؟“ حضرت عبدالرحمن بن حاطب رضی اللہ عنہ نے کہا: ”یہ آپ کو اس آدمی کے متعلق آگاہ کرنا چاہتی ہے جس نے اس کے ساتھ زنا کیا ہے۔“ ابو حمزہ رحمہ اللہ نے کہا: ”میں حضرت ابن عباس رضی اللہ عنہما اور لوگوں کے درمیان ترجمانی کرتا تھا۔“ بعض لوگوں نے کہا ہے: ”حاکم وقت کے لیے دو مترجم ہونے چاہئیں۔“ [صحيح البخاري/كِتَاب الْأَحْكَامِ/حدیث: 7195]

حضرت عبداللہ بن عباس رضی اللہ عنہ سے روایت ہے، انہیں ابو سفیان رضی اللہ عنہ نے بتایا کہ ہرقل نے انہیں قریش کی جماعت کے ہمراہ اپنے ہاں بلا بھیجا۔ پھر اس نے اپنے ترجمان سے کہا: ”ان سے کہو: میں اس شخص (نبی صلی اللہ علیہ وسلم ) کے متعلق پوچھنے والا ہوں، اگر یہ مجھ سے جھوٹ کہے تو آپ اسے جھٹلا دیں۔“ پھر انہوں نے پوری حدیث بیان کی۔ آخر میں اس نے ترجمان سے کہا: ”اس سے کہو؛ اگر تمہاری باتیں مبنی بر حقیقت ہیں تو وہ شخص اس ملک کا سربراہ ہوگا جو اس وقت میرے قدموں کے نیچے ہے۔“ [صحيح البخاري/كِتَاب الْأَحْكَامِ/حدیث: 7196]