حضرت طارق بن شہاب رضی اللہ عنہ سے روایت ہے انہوں نے کہا: ایک یہودی آدمی نے حضرت عمر رضی اللہ عنہ سے کہا: ”اگر یہ آیت: ﴿الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا﴾ [سورة المائدة: 3] ”آج میں نے تمہارے لیے تمہارا دین مکمل کر دیا اور اپنی نعمت تم پر پوری کر دی اور اسلام کو بطورِ دین تمہارے لیے پسند کر لیا۔“ ہم پر نازل ہوتی تو ہم اس دن کو بطورِ عید مناتے۔“ حضرت عمر رضی اللہ عنہ نے یہ سن کر فرمایا: ”میں خوب جانتا ہوں یہ آیتِ کریمہ کس روز نازل ہوئی۔ یہ آیت عرفہ کے روز جمعے کے دن نازل ہوئی تھی۔“ سفیان نے حضرت مسعر سے، انہوں نے قیس سے اور انہوں نے طارق سے مذکورہ حدیث سنی۔ [صحيح البخاري/كِتَاب الِاعْتِصَامِ بِالْكِتَابِ وَالسُّنَّةِ/حدیث: 7268]

حضرت انس بن مالک رضی اللہ عنہ سے روایت ہے انہوں نے حضرت عمر رضی اللہ عنہ سے وہ خطبہ سنا جو انہوں نے وفاتِ نبوی کے دوسرے دن پڑھا تھا، جس دن مسلمانوں نے حضرت ابوبکر رضی اللہ عنہ کی بیعت کی تھی۔ حضرت عمر رضی اللہ عنہ رسول اللہ صلی اللہ علیہ وسلم کے منبر پر چڑھے اور حضرت ابوبکر رضی اللہ عنہ سے پہلے خطبہ پڑھا اور فرمایا: ” «أَمَّا بَعْدُ» ! اللہ تعالیٰ نے اپنے رسول صلی اللہ علیہ وسلم کے لیے جو تمہارے پاس تھی یعنی دنیا کے بجائے وہ چیز پسند کی جو اس کے پاس ہے، یعنی آخرت۔ یہ کتاب جس کے ذریعے سے اللہ تعالیٰ نے تمہارے رسول اللہ مقبول صلی اللہ علیہ وسلم کی رہنمائی فرمائی اگر تم اسے مضبوطی سے پکڑ رکھو تو ہدایت پر رہو گے، یعنی اسی راستے پر گامزن رہو گے جو اللہ تعالیٰ نے اپنے رسول کو بتایا تھا۔“ [صحيح البخاري/كِتَاب الِاعْتِصَامِ بِالْكِتَابِ وَالسُّنَّةِ/حدیث: 7269]

حضرت ابن عباس رضی اللہ عنہ سے روایت ہے، انہوں نے کہا: مجھے نبی صلی اللہ علیہ وسلم نے اپنے سینے مبارک سے لگا کر یہ دعا فرمائی: «اللَّهُمَّ عَلِّمْهُ الْكِتَابَ» ”اے اللہ! اسے کتاب کا علم سکھا۔“ [صحيح البخاري/كِتَاب الِاعْتِصَامِ بِالْكِتَابِ وَالسُّنَّةِ/حدیث: 7270]

حضرت ابو برزہ اسلمی رضی اللہ عنہ سے روایت ہے انہوں نے فرمایا: ”اللہ تعالیٰ نے تمہیں اسلام اور حضرت محمد صلی اللہ علیہ وسلم (کی تعلیم) کے ذریعے سے غنی اور بلند کر دیا ہے۔“ ابو عبداللہ (امام بخاری رحمہ اللہ) نے کہا: ”اس حدیث میں «يُغْنِيَكُمْ» کے الفاظ ہیں جبکہ اصل «يُعِيشَكُمْ» ہیں، حقیقت حال معلوم کرنے کے لیے اصل کتاب ”الاعتصام“ دیکھی جائے۔“ [صحيح البخاري/كِتَاب الِاعْتِصَامِ بِالْكِتَابِ وَالسُّنَّةِ/حدیث: 7271]

حضرت عبداللہ بن دینار رحمہ اللہ سے روایت ہے کہ حضرت عبداللہ بن عمر رضی اللہ عنہما نے عبدالملک بن مروان کو خط لکھا کہ وہ اس کی بیعت کرتے ہیں، (نیز لکھا:) ”جہاں تک مجھ سے ہو سکے گا تیرا حکم سنوں گا اور اسے تسلیم کروں گا بشرطیکہ وہ اللہ کی شریعت اور رسول اللہ صلی اللہ علیہ وسلم کی سنت کے مطابق ہو۔“ [صحيح البخاري/كِتَاب الِاعْتِصَامِ بِالْكِتَابِ وَالسُّنَّةِ/حدیث: 7272]